بۇگىندە جەرگىلىكتى جەرلەردە تۇرعىن ءۇي الۋدىڭ كەزەگىندە تۇرعان تۇرعىنداردى باسپانامەن قامتۋدىڭ بارلىق تەتىكتەرى قاراستىرىلۋدا. سونىڭ ىشىندە باسىمدىق جاڭا تۇرعىن ۇيلەردىڭ قۇرىلىسى مەن بىرگە بۇرىن قولدانىستا بولىپ كەيىننەن بوساپ قالعان تۇرعىن ۇيلەردە قايتا جاڭعىرتۋ جۇمىستارىنا بەرىلىپ وتىر. ءقازىر وڭىردە وسىندا 37 تۇرعىن ءۇي قايتا جاڭعىرتۋ جۇمىستارىن جۇرگىزۋدى قاجەتسىنەدى. بۇل ۇيلەر تولىق جوندەلىپ پايدالانۋعا بەرىلگەن كەزدە 3514 وتباسى باسپانا باقىتىن سەزىنۋگە مۇمكىندىك الادى، دەپ جازادى Qamshy.kz اقپارات اگەنتتىگى. 

مۇنداي تۇرعىن ۇيلەر كەزىندە ءىرى وندىرىستىك وشاعىنىڭ ماڭىنا سالىنىپ، كەڭەستىك جۇيە تاراعان سوڭ بوس قالعان قاراتاۋ، جاڭاتاس قالالارىندا جەتكىلىكتى. سول سەكىلدى توعىز جولدىڭ تورابىنداعى شۋ قالاسىندا يەسسىز قالعان تۇرعىن ۇيلەر بار. ەكى جىل بۇرىن مۇنداعى «جەتىسۋ» تۇرعىن القابىنداعى تۇرعىن ءۇيدىڭ جاڭعىرتۋ ەسەبىنەن 75 وتباسىنىڭ باسپانالى بولعانى ەستە. سونداي-اق جاڭاتاس قالاسىندا دا قايتا جاڭعىرتۋدان وتكەن تۇرعىن ۇيلەردىڭ ەسەبىنەن ءبىرقاتار جەرگىلىكتى ازاماتتاردىڭ تۇرعىن ۇيگە قول جەتكىزەنى بەلگىلى.

–جالپى ءقازىر وڭىردەگى قالالاردا قايتا جاڭعىرتۋدى قاجەت ەتەتىن 37 تۇرعىن ءۇي ەسەپكە الىنعان. ولاردى جوندەۋ ەسەبىنەن 3500-دەن استام وتباسىنى باسپانامەن قامتۋ جوسپارلاندى. كۇردەلى جوندەۋدى قاجەت ەتەتىن نىسانداردىڭ 18ء-سى كوممۋنالدىق مەنشىكتە بولسا، 17 ءۇي جەكە مەنشىكتە. ال 2 تۇرعىن ءۇيدىڭ مەنشىك يەسى انىقتالمادى.

اعىمداعى جىلى قايتا جاڭعىرتۋدى قاجەت ەتەتىن 5 تۇرعىن ۇيدە قۇرىلىس جۇمىستارى جۇرگىزىلۋدە. اتاپ ايتقاندا شۋ قالاسىندا «جانسايا» شاعىن اۋدانىندا ىرگەتاسى 1989 جىلى قالانعان №1 تۇرعىن ءۇيدىڭ قۇرىلىسى جۇرگىزىلىپ جاتىر. مۇنان بولەك جاڭاتاس قالاسىندا 1 شاعىن اۋدانداعى 9 تۇرعىن ۇيگە قايتا جاڭعىرتىلۋدا. بۇل نىسانداردى پايدالانۋعا بەرۋ ەسەبىنەن جىل سوڭىنا دەيىن 326 پاتەردە قونىس تويى تويلانادى. ال كەلەر جىلى رەسپۋبليكالىق بيۋدجەتتەن قارجىلاندىرىلۋىمەن 115 پاتەرلىك 2 تۇرعىن ءۇيدىڭ قايتا جاڭعىرتۋ جۇمىستارى جۇرگىزىلمەك.

جالپى تۇرعىن ۇيلەردى بيۋدجەت قارجىسىمەن قايتا جاڭعىرتۋدىڭ زاڭدىلىعىنا ساي ولار ەڭ اۋەلى كوممۋنالدىق مەنشىككە ءوتۋى كەرەك. ءقازىر قاراتاۋ قالاسىنداعى 10، جاڭاتاس قالاسىنداعى 6، قورداي اۋىلىنداعى 1 تۇرعىن ءۇيدى جەكە مەنشىكتەن كوممۋنالدىق مەنشىككە الۋ بويىنشا ءتيىستى راسىمدەر جۇرگىزىلىپ جاتىر،–دەيدى وبلىس اكىمدىگىنىڭ قۇرىلىس باسقارماسىنىڭ باسشىسى جايىقباي شالداروۆ.