تاراز قالاسىنىڭ اۋماعىندا ءبىرقاتار جولدار مەن كوشە بۇرىلىستارىندا، تۇيىقتاردا جوندەۋ جۇمىستارى قارقىندى جۇرگىزىلۋدە، دەپ جازادى Qamshy.kz اقپارات اگەنتتىگى. 

بۇگىندە تاراز قالاسىنداعى جالپى ۇزىندىعى 78، 022 شاقىرىم بولاتىن جول، ياعني 138 كوشە جانە بۇرىلىستار مەن تۇيىقتاردا جوندەۋ جۇمىستارى قولعا الىنعان. مۇنداعى 85 ۋچاسكەدە اسفالتتاۋ جۇمىستارى جۇرگىزىلسە، 20 كوشە مەن 3 بۇرىلىسقا اسفالت جابىندىسى توسەلۋدە. ءقازىر بۇل جۇمىستار ءوز مارەسىنە جەتىپ قالدى. سونىمەن قاتار وبلىس ورتالىعىنداعى 46 كوشە مەن 14 بۇرىلىس، 2 تۇيىققا اسفالت جابىندىسىن توسەۋگە دايىندىق جۇمىستارىنا دا قان جۇگىردى. سونداي-اق وسى جۇمىستار شەڭبەرىندە قالاداعى بارلىعى 1 330 كوشەدە جاياۋ جۇرگىنشىلەرگە ارنالعان جول سالۋ ماسەلەسى دە كۇن تارتىبىنە قويىلىپ وتىر.

قالا ىشىندەگى جولداردى جوندەۋ جۇمىستارى شاھاردىڭ «تايۆان» القابىندا قارقىن العان. مۇندا ۇزىندىعى 27،7 شاقىرىم بولاتىن 18 كوشەگە تاس توسەلىپ، جوندەۋ جۇمىستارى جۇرگىزىلىپ جاتىر. بۇگىندە اتالعان القاپتاعى 14 كوشەگە تاس جول توسەلدى. تاراز قالاسىنداعى كوشەلەردى جوندەۋ جۇمىستارىنا جالپى سوماسى 481 ميلليون 564 مىڭ قارجى قاراستىرىلىپ وتىر.

ءوز كەزەگىندە ۇزاق جىلدان جوندەۋ كورمەگەن كوشەدەگى قۇرىلىستىڭ قارقىنى جەرگىلىكتى تۇرعىنداردىڭ كوڭىلىنەن شىعۋدا.

–«تايۆان» القابىنداعى د. مەندەلەيەۆ كوشەسىندە تۇرىپ كەلە جاتقانىما قىرىق جىلدان استى. وسى ۋاقىت ارالىعىندا كوشەگە جوندەۋ جۇمىستارى جۇرگىزىلگەن جوق. ءبىزدىڭ كوشەنىڭ تۇرعىندارى جول ازابىن ءبىر كىسىدەي تارتتى. اسىرەسە جاۋىندى كەزدەرى باتپاقتان اياق الىپ ءجۇرۋ مۇمكىن ەمەس ەدى. امالسىزدان اياق كيىمنىڭ سىرتىنان پلاستيك پاكەت كيگەن كۇندەر دە بولدى. ەندى مىنە اسقار مىرزاحمەتوۆتىڭ باستاماسىمەن كوشەمىزگە جوندەۋ جۇمىستارى جۇرگىزىلە باستادى. ءوڭىر باسشىسىنا كوشە تۇرعىندارى اتىنان انالىق العىسىمدى جەتكىزگىم كەلەدى، – دەيدى «تايۆان» القابىنداعى د. مەندەلەيەۆ كوشەسىنىڭ تۇرعىنى ارۋنا مۇسابەكوۆا.

جالپى وڭىردەگى سوڭعى جىلدارى تۇرعىندار ءۇشىن قاجەتتى ينفراقۇرىلىمدار جۇرگىزۋ ىسىندە ىلكىمدىلىك بايقالادى. اسىرەسە كوشەلەردى جوندەۋ ءىسى قارقىندى جۇرگىزىلدى. بۇعان دەيىن باستى نازاردا ورتالىق داڭعىلدار بولسا ەندىگى كەزەكتە شاعىن اۋداندار مەن قالا سىرتىنداعى تۇرعىن القاپتارىنداعى جول ازابىن تارتقان اعايىننىڭ جاي-كۇيىنە باسىمدىق بەرىلۋدە.