وتكەن جىلى وبلىس اكىمىنىڭ باستاماسىمەن اۋىلدىق ەلدى مەكەندەردەگى كىتاپحانالاردىڭ بازاسىنان سيفرلاندىرىلعان اقپاراتتىق جانە كوۆوركينگ ورتالىقتارى اشىلا باستاعان بولاتىن. سول كەزدەن بەرى وڭىردەگى 103 اۋىلدىق وكرۋگتەگى كىتاپحانالار جانىنان 146 كوۆوركينگ جانە سيفرلاندىرىلعان اقپاراتتىق ورتالىعى اشىلدى. بۇگىنگى تاڭدا ولارداعى «cao-zhambyl.kz» سايتى ارقىلى تۇرعىنداردىڭ 5383 سۇرانىسى قاناعاتتاندىرىلدى، دەپ جازادى Qamshy.kz اقپارات اگەنتتىگى. 

اقپاراتتىق ورتالىقتارعا نەگىزىنەن اۋىل تۇرعىندارى ءبىلىم سالاسىنا قاتىستى ماسەلەلەردى انىقتاۋ بويىنشا قايىرىلادى. سايكەسىنشە بۇل سالا بويىنشا تۇرعىندارعا بەرىلگەن جالپى اقپاراتتىڭ كولەمى 1080ء-دى قۇرايدى. سونىمەن قاتار اۋىل شارۋاشىلىعى ماسەلەسى بويىنشا 754 سۇرانىس قاناعاتتاندىرىلعان. مۇنان بولەك اقپاراتتىق ورتالىق ماماندارى اۋىل تۇرعىندارىنىڭ تالابىنا ساي egov.kz ەلەكتروندى پورتالى ارقىلى 16064 انىقتاما بەرگەن. ەلەكتروندى انىقتامالاردىڭ تەڭ جارتىسىن مەكەنجاي انىقتاماسى قۇرايدى.

–باسقارمامەن ەلدى-مەكەندەردە اشىلعان ورتالىقتاردىڭ جابدىقتالۋىنا زەردەلەۋ جۇمىستارى جۇرگىزىلدى. سونىمەن بىرگە جامبىل وبلىسىنىڭ ينۆەستورلارعا قىزمەت كورسەتۋ، جوبالىق باسقارۋ جانە سيفرلاندىرۋ ورتالىعىمەن بىرلەسىپ سيفرلاندىرىلعان اقپاراتتىق ورتالىقتاردىڭ جابدىقتالۋى بويىنشا ءبىرىڭعاي تالاپتارى دا ازىرلەندى. مۇنان بولەك، اۋىلدىقتاردىڭ سۇرانىسىن ەلەكتروندى رەجيمدە قاناعاتتاندىرىپ جۇرگەن سيفرلاندىرىلعان اقپاراتتىق ورتالىقتاردا قىزمەت كورسەتەتىن كىتاپحاناشىلاردىڭ بىلىكتىلىگىن ارتتىرۋ دا باستى ماسەلە. بۇل ورايدا «سيفرلى قازاقستان: رۋحاني جاڭعىرۋ: كىتاپحانانىڭ جاڭا كەلبەتى» وبلىستىق سەمينارى، ايشا ءبيبى اۋىلدىق، بايزاق، تالاس اۋداندىق كىتاپحانالار بازاسىندا «سيفرلى قازاقستان: سيفرلى قوعام جانە ءىت تەحنولوگيالار» كىتاپحانالىق ايماقتىق كلاستەرلەرى، «بۇگىنگى قوعام كىتاپحاناسىنىڭ جۇمىسىن ترانسفورماسيالاۋ (وزگەرتۋ): جاڭا پىشىندەر مەن ۇعىمدار» وبلىستىق فورسايت سەسسياسى وتكىزىلدى. اتالعان شارالارعا زاماناۋي كىتاپحانا قىزمەتكەرلەرىمەن بىرگە حالىققا قىزمەت كورسەتۋ ورتالىعىنىڭ وكىلدەرى دە قاتىسىپ، «Mgov»، «Telegram-bot»، «EgovKzBot» قوسىمشالارىمەن جۇمىس جاساۋ تاسىلدەرىن كورسەتتى، –دەيدى وبلىس اكىمدىگىنىڭ مادەنيەت، قۇجاتتاما جانە ارحيۆتەر باسقارماسىنىڭ باسشىسى دۇيسەنالى بىقىبايەۆ.

جالپى وڭىردە 2018 جىلدان بەرى 125 سيفرلاندىرىلعان اقپاراتتىق ورتالىق پەن 21 كوۆوركينگ ورتالىعى اشىلعان. اعىمداعى جىلى 63 اۋىلدىق وكرۋگتەگى ءدال وسىنداي 76 ورتالىق قىزمەتىنە كىرىستى.