بۇگىنگى كۇندە ءوڭىر تۇرعىندارىن باسپانامەن قامتۋ ەڭ وزەكتى ماسەلە سانالادى. ويتكەنى باسپانا كەزەگىندە تۇرعان ازاماتتاردىڭ سۇرانىسىن قاناعاتتاندىرۋ وڭىرلەردەگى الەۋمەتتىك-ەكونوميكالىق دامۋدى ەكشەۋدە باستى كورسەتكىشتىڭ بىرىنە اينالدى. بۇل ورايدا، جامبىل ءوڭىرى قازاقستان-رەسپۋبليكاسىنىڭ تۇڭعىش پرەزيدەنتى-ەلباسى نۇرسۇلتان نازاربايەۆتىڭ باستاماسىمەن ىسكە قوسىلعان «نۇرلى جول» مەملەكەتتىك باعدارلاماسىنىڭ مۇمكىندىگى مولىنان پايدالانۋدا، دەپ جازادى Qamshy.kz اقپارات اگەنتتىگى. 

جامبىل وڭىرىندە اتالعان مەملەكەتتىك باعدارلامانى ىسكە اسىرۋ ماقساتىندا بيىل جالپى سوماسى 20 ميلليارد 200 ميلليون تەڭگە بولاتىن قارجى ءبولىندى. بۇل قارجىعا 30 تۇرعىن ءۇي مەن 187 ارەندالىق پاتەر ساتىپ الىندى. سونداي-اق وبلىستاعى 15 ءتۇرعىنۇي القابىنداعى ينجەنەرلىك ينفراقۇرىلىممەن دامىتۋ جوبالارى مەن 11 ىشكى الاڭدا اباتتاندىرۋ جۇمىستارى جۇرگىزىلدى.

–كەلەر جىلى مەملەكەتتىك باعدارلاماعا قاراستىرىلعان 18 ميلليارد 300 ميلليون تەڭگە قارجىعا 38 تۇرعىن ءۇي مەن 261 ارەندالىق پاتەر ساتىپ الۋ جوسپارلانۋدا. سونداي-اق وڭىردەگى 12 تۇرعىن ءۇي القابى ينجەنەرلىك ينفراقۇرىلىممەن قامتاماسىز ەتىلەتىن بولادى.

جالپى اعىمداعى جىلى وبلىستىڭ ناقتىلانعان بيۋدجەتىنە سايكەس الەۋمەتتىك ماڭىزى بار، تۇرعىن ۇيلەر مەن وزگە دە اكىمشىلىك عيماراتتاردىڭ قۇرىلىسىن جۇرگىزۋ جۇمىستارىنا 28 ميلليارد 348 ميلليون تەڭگە قاراستىرىلدى. اتالعان قاراجاتتار ەسەبىنەن وڭىردە بارلىعى 90 نىساننىڭ قۇرىلىسى ىسكە اسىرىلىپ جاتىر. مۇنداعى 70 نىسانداعى قۇرىلىسى جۇمىستارى اعىمداعى جىلى اياقتالادى. ال قالعان 20 نىسان كەلەر جىلى پايدالانۋعا بەرىلەدى. كۇنى بۇگىنگى كۇنگە دەيىن وبلىستا قۇرىلىسىن اعىمداعى جىلى اياقتاۋ جوسپارلانعان 21 نىسانداعى ءتيىستى جۇمىستار اياقتالىپ، تاپسىرىس بەرۋشىنىڭ بالانسىنا بەرىلدى،–دەيدى وبلىس اكىمدىگىنىڭ قۇرىلىس باسقارماسىنىڭ باسشىسى جايىقباي شالداروۆ.

ءوڭىر تۇرعىندارىن اتالعان مەملەكەتتىك باعدارلاما ەسەبىنەن تۇرعىن ۇيمەن قامتۋدا ەڭ اۋەلى كوپ بالالى جانە از قامتىلعان وتباسىلار ساناتىنا باسىمدىق بەرىلۋدە. سايكەسىنشە بۇگىنگى كۇندە وبلىستا 1768 كوپبالالى وتباسىنىڭ تۇرعىن ءۇي كەزەگىندە تۇرعانى انىقتالدى. ەندىگى كەزەكتە باسپانامەن قامتۋ شارالارىندا تۇرعىنداردىڭ ءدال وسى ساناتىنا ايرىقشا ءمان بەرىلەدى. بۇگىندە تاراز قالاسىنىڭ وزىندە ءدال وسى ساناتقا جاتقىزىلاتىن وتباسىلارعا ارناپ 4 الەۋمەتتىك جاتاقحانا قۇرىلىسى جۇرگىزىلىپ جاتىر. جەلتوقسان ايىندا اياقتالاتىن جاتاقحانادا 180 وتباسى باسپانامەن قامتىلاتىن بولادى.