اعىمداعى جىلى تاراز قالاسىندا كوپ قاباتتى تۇرعىن ۇيلەرگە جوندەۋ جۇمىستارىن جۇرگىزۋگە 989،6 ميلليون تەڭگە ءبولىندى. ءوز كەزەگىندە، بۇل قارجى ماقساتتى يگەرىلىپ، وبلىس ورتالىعىنداعى 25 تۇرعىن ۇيگە كۇردەلى جوندەۋ جۇمىستارىن جۇرگىزۋگە جۇمسالىپ وتىر، دەپ جازادى Qamshy.kz اقپارات اگەنتتىگى. 

جالپى بۇگىنگى تاڭدا تاراز قالاسى بويىنشا بارلىعى 1 298 كوپپاتەرلى تۇرعىن ءۇي بولسا، ونىڭ 300ء-ى جۋىعى كۇردەلى جوندەۋ جۇمىستارىن قاجەت ەتەدى. توزىعى جەتكەن تۇرعىن ۇيلەردى قايتا جاڭعىرتۋ جۇمىستارى بويىنشا يندۋستريا جانە ينفراقۇرىلىمدىق دامۋ مينيسترلىگىنىڭ قۇرىلىس كوميتەتىنە بيۋدجەتتىك ءوتىنىم دە بەرىلگەن. اتالعان بيۋدجەتتىك وتىنىمگە وڭ شەشىم شىعارىلعان جاعدايدا 2020 جىلى تاراز قالاسىنداعى 80 تۇرعىن ۇيگە جوندەۋ جۇمىستارى جۇرگىزىلمەك. ال بيىل بۇل ماقساتقا 1 ميلليارد تەڭگەگە جۋىق قازىنا قارجىسى قاراستىرىلىپ، وعان 25 تۇرعىن ءۇي جوندەلىپ جاتىر. تۇرعىن ۇيلەردى جوندەۋ جۇمىستارىنا بولىنگەن اقشانىڭ تەڭ جارىمى تاراز قالاسىنىڭ قازىناسى ەسەبىنەن قاراستىرىلعان. ال قالعان قارجى بۇعان دەيىن جوندەۋ جۇمىستارى جۇرگىزىلگەن ۇيلەردەن قايتارىم قارجى ەسەبىنەن تولەنگەن.

تارازداعى تۇرعىن ۇيلەردى قايتا قالپىنا كەلتىرۋ جۇمىستارى ناتيجەسىندە «اقبۇلاق» ىقشاماۋدانىنداعى №9،17 ۇيلەردىڭ دە ءسانى كىردى. ىرگەتاسى جارتى عاسىر بۇرىن قالانعان تۇرعىن ۇيلەردىڭ بۇعان دەيىنگى جاعدايى ءماز ەمەس ەدى. توزىعى جەتكەن تۇرعىن ۇيلەرگە وتكەن جىلدىڭ قاراشا ايىندا «سترويتەلي ۆەكا» جاۋاپكەرشىلىگى شەكتەۋلى سەرىكتەستىگىمەن كۇردەلى جوندەۋ جۇمىستارى جۇرگىزىلدى. بۇگىندە 90 وتباسى پانالاپ وتىرعان ەكى تۇرعىن ءۇيدىڭ تۇرعىندارى دا اتقارىلعان شارۋانىڭ كوڭىلدەرىنەن شىعاتىنىن ايتادى. جوندەۋ جۇمىستارىنا بولىنگەن 47 ميلليون 856 مىڭ 838 تەڭگەنى ماقساتتى پايدالانعان سەرىكتەستىك تۇرعىن ۇيلەردىڭ سىرتقى قاسبەتىن جوندەپ، ارلەپ قانا قويماي ونىڭ شاتىرلارى مەن جىلۋ، ىستىق جانە سالقىن سۋ، كارىز جۇيەلەرى مەن ەليەۆاتور تورابىنان تۇراتىن ينجەنەرلىك جەلىلەرىن تولىقتاي جوندەۋدەن وتكىزگەن. سونىمەن قاتار تۇرعىن ۇيلەردىڭ كىرەبەرىستەرىنە دە تولىقتاي كۇردەلى جوندەۋ جۇمىستارى جاسالىنعان.

راسىندا وبلىس ورتالىعىندا تۇرعىن ۇيلەردىڭ دەنى 50 جىل بۇرىن سالعانىمەن ەشقانداي جوندەۋ كورمەي توزىعى ابدەن جەتكەن ەدى. الداعى ۋاقىتتا وسى ۇيلەردىڭ تۇرعىندارى دا تۇرعىن ۇيلەردى جوندەۋدەن وتكىزۋ جۇمىستارىنىڭ شاراپاتىن تولىق سەزىنە الماق.