جامبىل وبلىسىندا بيۋدجەت ەسەبىنەن پايدالانۋعا بەرىلەتىن كوپپاتەرلى تۇرعىن ءۇي كولەمى وتكەن جىلدىڭ ەسەپتى كەزەڭىمەن سالىستىرعاندا 40 پايىزعا وسكەن، دەپ جازادى Qamshy.kz اقپارات اگەنتتىگى.
بيىل وڭىردەگى تۇرعىن ۇيلەردىڭ قۇرىلىسىنا بيۋدجەت ەسەبىنەن 28 ميلليارد 348 ميلليون تەڭگە قارجى قاراستىرىلعان.
– وتكەن جىلى بارلىق قارجى كوزدەرىنەن وڭىردە 29 تۇرعىن ءۇيدىڭ
قۇرىلىسى جۇرگىزىلدى. 2018 جىلدىڭ قاڭتار-قىركۇيەك ايلارىندا 12 تۇرعىندى ءۇيدىڭ قۇرىلىسى اياقتالىپ، جىل سوڭىنا دەيىن 19 تۇرعىن ءۇي پايدالانۋعا بەرىلدى. حالىق يگىلىگىنە جاراعان تۇرعىن ءۇيدىڭ جالپى كولەمى 272،3 مىڭ شارشى مەتردى قۇرايدى.
ال اعىمداعى جىلى 30 تۇرعىن ءۇيدىڭ قۇرىلىسى جۇرگىزىلىپ جاتىر. جىل سوڭىنا دەينى 20 تۇرعىن ءۇيدىڭ قۇرىلىسى اياقتالىپ، پايدالانۋعا بەرىلمەك. قالعان 10 تۇرعىن ءۇيدىڭ قۇرىلىسى وتپەلى نىسانعا جاتادى. جىل باسىنان بەرى وڭىردە 11 ءۇيدىڭ قۇرىلىسى اياقتالىپ، پايدالانۋعا بەرىلگەن تۇرعىن ءۇيدىڭ كولەمى 274 مىڭ شارشى مەترگە تەڭ بولدى، –دەيدى وبلىس اكىمدىگى قۇرىلىس باسقارماسىنىڭ باسشىسى جايىقباي شالداروۆ.
بيىل وبلىستا ناقتىلانعان بيۋدجەتكە ساي 90 نىساننىڭ قۇرىلىسىن جۇرگىزۋ جوسپارلانىپ، بۇل جۇمىستارعا رەسپۋبليكالىق بيۋدجەتتەن 11 ميلليارد 811 ميلليون تەڭگە قارجى قاراستىرىلسا، سالانى جەرگىلىكتى بيۋدجەت ەسەبىنەن قارجىلاندىرۋ كولەمى 16 ميلليارد 536 ميلليون تەڭگەنى قۇرادى.
جالپى وڭىردە وبلىس اكىمىنىڭ باستاماسىمەن جوبالىق سمەتالىق قۇجاتتامالاردى ازىرلەۋدە بيۋدجەتتى وڭتايلاندىرۋ شاراسى قولعا الىندى. ناتيجەسىندە تەك وتكەن جىلدىڭ وزىندە 133 جوبانى ىسكە اسىرۋ مۇمكىندىگىن قايتا قاراۋ ارقىلى 10 ميلليارد تەڭگە ۇنەمدەلگەن. بۇل وڭتايلاندىرۋ شاراسى قۇرىلىس نىساندارىنىڭ كولەمىن قاجەتتىلىككە قاراي نەگىزدەۋ ارقىلى جۇرگىزىلدى. ماسەلەن مەكتەپتەردىڭ قۇرىلىسى 1 وقۋشىعا 16،85 شارشى مەتر ءادىسى بويىنشا جوسپارلاندى. سونداي-اق بۇعان دەيىن مەديسينالىق–فەلدشەرلىك پۋنكتەر مەن دارىگەرلىك امبۋلاتوريالاردى سالۋعا 65-90 ميلليون تەڭگە جۇمسالىپ كەلگەن بولسا، ەندىگى كەزەكتە بۇل قاراجاتتىڭ مولشەرى 30-45 ميلليون تەڭگەگە دەيىن تومەندەتىلدى. سول سەكىلدى دەنە شىنىقتىرۋ، سپورتتىق ساۋىقتىرۋ كەشەندەردىڭ قۇنى 227 ميلليون تەڭگەدەن 115 ميلليون تەڭگەگە دەيىن ءتۇسىرىلدى. ال بۇعان دەيىن اۋىلدىق كلۋبتارىنىڭ قۇرىلىسىنا جۇمسالىپ كەلگەن 200 ميلليون تەڭگەدەن 130 ميلليون تەڭگە قارجى ۇنەمدەلدى.
