تاراز مەملەكەتتىك پەداگوگيكالىق ۋنيۆەرسيتەتىنىڭ ءماجىلىس زالىندا گۋمانيتارلىق عىلىمدار جوعارى مەكتەبىنىڭ ۇيىمداستىرۋمەن اباي قۇنانباي ۇلىنىڭ 175 جىلدىعىنا وراي «اسىل ءسوزدىڭ الداسپانى» اتتى اپتالىقتىڭ اشىلۋ سالتاناتى ءوتتى. شاراعا وقۋ ورنىنىڭ وقىتۋشىلارمەن ستۋدەنتتەرى، ب ا ق وكىلدەرى قاتىستى.

اپتالىقتى وقۋ ورىنىنىڭ رەكتورى ەرجان امىربەك ۇلى اشىپ، جاستاردى اقىننىڭ شىعارماشىلىعىن ناسيحاتتاۋعا بەلسەندى اتسالىسۋعا شاقىردى.

– ۇلى اقىننىڭ مەرەيتويىنا وراي ۋنيۆەرسيتەت قابىرعاسىندا ءبىر اپتا بويى ءتۇرلى باعىتتا ءىس-شارالار ۇيىمداستىرىلماق. ءبىر قاراعاندا تانىس تاقىرىپ، تانىس بەينە سەكىلدەنگەنمەن، ابايدى تانىعان سايىن، جاڭا ىلىمگە، جاڭا كوزقاراسقا قول جەتكىزەتىنىمىز راس. ورىستار ءۇشىن – پۋشكين، اعىلشىندار ءۇشىن – شەكسپير، گرۋزيندەر ءۇشىن – رۋستاۆەلي قانداي ۇلى قۇبىلىس بولسا، قازاقتار ءۇشىن اباي دا سونداي تەڭدەسسىز قۇبىلىس. «اباي ءسوزى – قازاقتىڭ بويتۇمارى، اباي مۇراسى – قازاقتىڭ قاسيەتتى قازىناسى» دەپ ەلباسىمىز ايتقانداي، دانا بابامىزدىڭ 175 جىلدىعىن ابىرويمەن اتاپ ءوتۋ اربىرىمىزگە ۇلكەن مىندەت. بۇل شارا ۋنيۆەرسيتەت ستۋدەنتتەرىنىڭ اباي ءومىرى مەن شىعارماشىلىعىنا دەگەن تانىمدىق قىزىعۋشىلىعىن ىنتالاندىرىپ، اباي مۇراسى ارقىلى قازاق ءتىلىنىڭ كوركەمدىك قازىناسىن، ءسوز ونەرىنىڭ بەينەلىلىگى مەن بايلىعىن تانىتىپ، جاستاردىڭ اراسىنان تالانتتى ستۋدەنتتەردى انىقتاپ، ولاردىڭ شىعارماشىلىق الەۋەتىن اشاتىنىنا سەنىمىم مول،-دەدى ەرجان امىربەك ۇلى.

مۇنان سوڭ گۋمانيتارلىق عىلىمدار جوعارى مەكتەبىنىڭ دەكانى گۇلنۇر بولاتبەك قىزى باستاعان ۇجىم اباي ولەڭدەرىن وقۋدان ارنايى بەينەماتەريال ءتۇسىرىپ، تاراز مەمەلەكەتتىك پەداگوگيكالىق ۋنيۆەرسيتەتىندەگى وزگە دە جوعارى مەكتەپتەرگە ەستافەتا جولدادى. سونىمەن بىرگە ابايتانۋشى مەكەمتاس مىرزاحمەت ۇلىنىڭ سۇحباتىنان ءۇزىندى كورەرمەندەرگە لەد ەكران ارقىلى كورسەتىلدى. ستۋدەنتتەردىڭ قاتىسۋىمەن وتكەن ارنايى قويىلىمدى كورەرمەندەر ىستىق ىقىلاسپەن قابىلدادى. اپتالىق اياسىندا كۋراتورلىق ساباقتار، اباي ولەڭدەرىن وقۋدان ارنايى ينستابايقاۋلار مەن ەسسە جازۋ سايىستارى، مەكتەپ وقۋشىلارى اراسىندا «اباي الەمى» اتتى زياتكەرلىك سايىستار جانە ارنايى كورمە، اشىق ميكروفون ايدارلارى ۇيىمداستىرىلماق. شارا سوڭىندا وقىتۋشىلار مەن ستۋدەنتتەر ۋنيۆەرسيتەت قابىرعاسىنان اباي قۇنانبايۇلىنا اشىلعان كابينەتپەن تانىستى.