تاراز قالاسىنداعى «دوستىق» ۇيىندە «قوعامدىق كەلىسىم» مەكەمەسىنىڭ ۇيىتقى بولۋىمەن ءتۇرلى ۇلت وكىلدەرىنىڭ «گاسترونوميلىق دامدەر» فەستيۆالى ءوتتى. ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا وتكەن شاراعا وبلىستاعى بارلىق ەتنوس وكىلدەرى قاتىسىپ، وزدەرىنىڭ ۇلتتىق تاعامدارىنىڭ شىعۋ تاريحىمەن تانىستىرىپ، جاسالۋ جولدارىن كورسەتتى. فەستيۆالدى وبلىستىق قازاقستان حالقى اسسامبلەياسى حاتشىلىعىنىڭ مەڭگەرۋشىسى مارجان قوجايەۆا اشىپ، قاتىسۋشىلارعا ساتتىلىك تىلەدى. –مۇنداي فەستيۆال بۇعان دەيىن رەسپۋبليكا كولەمىندە وتكىزىلىپ كەلگەن بولاتىن. بيىل العاش رەت ءوزىمىزدىڭ وڭىردە ۇيىمداستىرۋدى ءجون سانادىق. ۇيىمداستىرۋداعى باستى ماقساتىمىز ەلىمىزدە تۇراتىن ءتۇرلى ۇلت وكىلدەرىنىڭ دوستىعىن نىعايتۋ، ۇلتتىق تاعام مەن ءسالت-داستۇردىڭ مادەنيەتىن جوعارى دەڭگەيگە كوتەرۋ جانە ناسيحاتتاۋ. سوندىقتان شاراعا بەلسەندى اتسالىسۋعا شاقىرامىن. تەك قوناق بولىپ كەتپەي ءتۇرلى ۇلتتاردىڭ اسپازدىق ەرەكشەلىگىن سارالاپ، باعا بەرىڭىزدەر. بۇل فەستيۆال، اسىرەسە، جاستاردىڭ وزدەرىنە اسا قىزىقتى بولىپ، وزگە ۇلت وكىلدەرىنىڭ مادەنيەتىنە سىي-قۇرمەتىن ارتتىرا تۇسەدى،- دەدى مارجان تورەقۇل قىزى.
شارادا جينالعان قاۋىمعا وبلىستاعى ۇزدىك مەيرامحانالار مەن كونديتەرلىك ورتالىقتاردىڭ بارماعىنان بال تامعان اسپازدارى ونەرلەرىن كورسەتتى. فەستيۆالدىڭ العاشقى بولىمىندە اباي ءومىر سۇرگەن كەزەڭدەگى تاعامدار بويىنشا شەبەرلىك سىنىبى كورسەتىلدى. بۇل بولىمدە العاشقى بولىپ كوپبالالى انا، اسپاز سىمبات سيقىمبايەۆا «بۇرمەقارىن»، «جاۋجۇرەك» تاعامىن دايىنداپ، قازىلار القاسىنا ۇسىندى. قۇنارلى دا، دارۋمەنگە باي «جاۋجۇرەك» اسىنىڭ جاسالۋىنا ەرەكشە توقتالدى. ونىڭ ايتۋىنشا بۇل تاعامدى ەرتەدە انالارىمىز اسىرەسە ۇل بالالارعا جاۋجۇرەك، باتىل بولسىن دەپ ءجيى دايىنداپ بەرەدى ەكەن. كەلەسى اسپاز مايسا الدابايەۆا تاۋ حالىقتارىنىڭ «حاچاپۋري»، «حيچينى» تاعامدارىن جاساپ كورسەتىپ، دايىنداۋدا ىجداحاتتىلىق پەن پىسىقتىقتى تالاپ ەتەتىن بۇل ءدامدى جاساۋداعى قۇپيالارىمەن ءبولىستى. لولا ءابدىقاحاروۆا جەڭىل جاسالاتىن سۋشي، كوكونىستەردەن جاسالاتىن تىسكەباسارلار جاساۋدىڭ قىر-سىرىمەن ءبولىستى. الەكساندر بوگدانوۆ ءتۇرلى سۋسىندار مەن كوكتەيلدەردى دايىنداپ كورسەتتى. اسىرەسە الەكسانداردىڭ المامەن ارلەپ جاساعان «شالاپ» سۋسىنى قازىلار القاسىنىڭ كوڭىلىنەن شىقتى. شارانىڭ كەلەسى بولىمىندە ۇلتتىق ناقىشتاعى، ۇلتتىق تاعامى مەن ىدىس-اياعى قويىلعان بىرنەشە ەتنومادەني بىرلەستىكتىڭ داستارحاندارى جايىلدى. وندا سول ۇلتتاردىڭ ءداستۇرلى مادەنيەتى، سالت-داستۇرلەرى تانىستىرىلدى.
پىكىر قالدىرۋ