بۇگىندە جول قۇرىلىسىنا مەملەكەت تاراپىنان ءبولىنىپ جاتقان كوڭىل از ەمەس. بۇل باعىتقا باعىتتالعان «وڭىرلەردى دامىتۋ»، «اۋىل – ەل بەسىگى» سىندى مەملەكەتتىك باعدارلامالار از ەمەس. سونىڭ ەسەسىنەن ەلدى مەكەندەردىڭ ەڭسەسى تىكتەلىپ، جۇرگىزۋشىلەر مەن جولاۋشىلارعا قولايلى جاعدايلار جاسالۋدا، دەپ جازادى Qamshy.kz اقپارات اگەنتتىگى. سوڭعى ۋاقىتتا ەلىمىزدە رەسپۋبليكالىق نەمەسە اۋداندىق ماڭىزى بار جولدار عانا ەمەس، اۋىلىشىلىك جولدارعا دا ەرەكشە ءمان بەرىلىپ كەلەدى. وسىنىڭ ءبىر دالەلى رەتىندە جامبىل وبلىسىنىڭ شالعاي قورداي اۋدانىنداعى اۋىلداردىڭ دا كوشە جولدارى رەتتەلە باستالدى.

ماسەلەن، قاقپاتاس اۋىلىندا س.مەيىرمان كوشەسى مەن د.قونايەۆ جانە ا.قۇنانبايەۆ كوشەسىنىڭ ەكى اراسى جوندەلىپ، اسفالت توسەلدى. سونىمەن قاتار، وكرۋگكە قاراستى بەرىكتاس اۋىلىنداعى تولە بي جانە ت.ساقالوۆا كوشەلەرى دە جوندەلدى. بۇل جۇمىستارعا جەرگىلىكتى بيۋدجەتتەن قوماقتى قارجى ءبولىنىپ، جۇمىستى «نۇرلى جول» جك ويداعىداي اتقارىپ شىققان.

– ويلى-شۇڭقىرلى كوشەمەن ءجۇرۋدىڭ سالدارىنان كولىگىمىز ءجيى بۇزىلىپ، ودان قالسا مەكتەپكە باراتىن بالالارىمىز كوكتەم-كۇز ايلارىندا لاي جەرمەن جۇرەتىن ەدى. ەندى مىنە تاقتاداي ءتۇزۋ اسفالت توسەلدى. وتە قۋانىشتىمىز. باسشىلىققا ايتار العىسىمىز شەكسىز، – دەيدى قاقپاتاس اۋىلىنىڭ تۇرعىنى اسحات تۋلىمبايەۆ.

اۋىلدىق وكرۋگ اكىمىدىگى قىزمەتكەرلەرىنىڭ ايتۋىنشا، ينفراقۇرىلىمدى دامىتۋ جۇمىستارى جالعاساتىن بولادى. مىسالى جاقىن ارادا بىرنەشە كوشەنى جارىقتاندىرۋ جۇمىسى قولعا الىنباق.

بۇدان بولەك، قوردايلىقتار اسىل تۇقىمدى مال باسى ارتتىرۋدا دا اۋقىمدى ءىس قىلۋدا.

مال باعۋ – قازاقتىڭ اتا كاسىبى. ەندى وسى كاسىپتى زامان تالابىنا ساي بەيىمدەۋ ونىڭ جاڭا قارقىنمەن دامۋىنا سەپتىگىن تيگىزەرى انىق. قاقپاتاس اۋىلدىق وكرۋگىندە ءسۇتتى باعىتتاعى ءىرى قارا وسىرەتىن شارۋالار كوپ. سونداي-اق، ءۇي ىرگەسىندە اسىل تۇقىمدى ءىرى قارانى ءوسىرىپ جۇرگەن ازاماتتار دا بار.

بەرىكتاس اۋىلىنىڭ تۇرعىنى الماس دانىشپانوۆ وسىدان ەكى جىل بۇرىن تاۋەكەل ەتىپ، 10 باس «شۆەد» جانە «گالستين» تۇقىمدى ءىرى قارانى ساتىپ الىپ، قوراسىنا كىرگىزگەن بولاتىن. بۇل اسىل تۇقىمدى ءىرى قارا جوعارى ونىمدىلىگىمەن ەرەكشەلەنەدى. دۇرىس كۇتىم جاساسا، كۇنىنە 25-30 ليتر ءسۇت بەرەتىن ويسىل قارا تۇقىمىن باپتاۋ دا وڭاي ەمەس. الماس دانىشپانوۆتىڭ ايتۋىنشا، اسىل تۇقىمدى مال ءوسىرۋ ءۇشىن ءبىراز ۋاقىت قاجەت. ۇلكەن كۇش-جىگەر جۇمساپ، ۇزدىكسىز جۇمىس ىستەمەيىنشە، ناتيجە شىعارۋ قيىن. دەسە دە، قيىندىققا مويىمايتىن ازامات بۇل ءىستى مىقتاپ قولعا الىپ، بۇگىندە مالدان ءتول الىپ جاتقان جايى بار. بۇگىندە ساۋىلعان ءسۇتتى جەرگىلىكتى كاسىپكەرلەر جاقسى باعامەن الۋدا. كەلەشەكتە ءسۇت ونىمدەرىن ءوندىرۋدى جوسپارلاپ جاتقان ازاماتتىڭ كاسىبى بەرەكەلى بولارىنا كۇمان جوق.