جامبىل وبلىستىق دوستىق ۇيىندە «جاستاردىڭ قوعامدىق ساناسىن جاڭعىرتۋ: الەۋەتى، كەلەشەگى جانە ماسەلەلەرى» تاقىرىبىندا وبلىستىق عىلىمي-پراكتيكالىق كونفەرەنسيا ءوتتى دەپ جازادى Qamshy.kz اقپارات اگەنتتىگى. اتالمىش كونفەرەنسيانىڭ ۇيىمداستىرۋشىلارى جامبىل وبلىسى اكىمى اپپاراتىنىڭ «قوعامدىق كەلىسىم» كوممۋنالدىق مەملەكەتتىك مەكەمەسى جانە م.ح. دۋلاتي اتىنداعى تاراز مەملەكەتتىك ۋنيۆەرسيتەتى جوعارى وقۋ ورىندارىنىڭ وقىتۋشىلارىن، عالىمداردى، فيلوسوفتاردى جانە ەتنومادەني بىرلەستىكتەردىڭ وكىلدەرىن كونفەرەنسيا جۇمىسىنا قاتىسۋعا شاقىردى. كونفەرەنسيادا جاس ۇرپاقتى قالىپتاستىرۋ مەن ىلگەرىلەتۋ جانە قازاقستاندىق قوعامدى دامىتۋداعى ساباقتاستىقتى قامتاماسىز ەتۋدىڭ نەگىزگى فاكتورى رەتىندە جاستاردىڭ قوعامدىق ساناسىن جاڭعىرتۋعا باعىتتالعان ماسەلەلەردى تالقىلادى.

يگى ءىستىڭ ۇيىمداستىرۋشىلارى عىلىمي قوعامداستىق پەن الەۋمەتتىك-ساياسي ينستيتۋتتاردىڭ كۇش-جىگەرىن بىرىكتىرۋ ءۇشىن وسىنداي ءىس-شارالاردىڭ جوعارى ماڭىزدىلىعىن اتاپ كورسەتە وتىرىپ، مەملەكەتتىك قۇرىلىم وكىلدەرىنىڭ، قوعام وكىلدەرىنىڭ قوعام ءۇشىن وزەكتى ماسەلەلەرىن جيىنعا قاتىسۋشىلاردىڭ نازارىنا ۇسىندى.

-بۇگىنگى كونفەرەنسيانىڭ ماقساتى جاستاردىڭ قوعامدىق ساناسىن وياتۋ، ولاردى سانالى تۇلعا رەتىندە قالىپتاستىرۋ. ومىرلىك ۇستانىمدارىن، كوزقاراستارىن كەڭەيتىپ، الەمدىك جاھاندانۋ ۇدەرىسىندە بولىپ جاتقان كوپتەگەن جاڭالىقتاردان قالىس قالماس ءۇشىن، ولاردىڭ بىلىمگە دەن قويۋىن قامتاماسىز ەتۋ. بۇگىنگى جيىندا وسى ماسەلەلەلەر تالقىلاندى. جاستارىمىزدىڭ كونفەرەنسيادان ويعا تۇيگەنى كوپ دەپ ويلايمىز، - دەدى جامبىل وبلىسى قازاقستان حالقى اسسامبلەياسى جانىنداعى عىلىمي-ساراپتامالىق توبىنىڭ مۇشەسى، م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ «فيلوسوفيا جانە ساياساتتانۋ» كافەدراسىنىڭ مەڭگەرۋشىسى، فيلوسوفيا عىلىمدارىنىڭ كانديداتى دينا دۇيسەباي قىزى.

كونفەرەنسيا بارىسىندا پلەنارلىق وتىرىس وتكىزىلىپ، ءبىرقاتار سەكسيا بويىنشا وزەكتى تاقىرىپتاردا پىكىرلەر ايتىلدى. تارقاتىپ ايتار بولساق: «قازىرگى جاستاردىڭ رۋحاني جاڭعىرۋى جانە ونىڭ ءتۇرلى سالالاردا كورىنىس تابۋى – ونەر، ءدىن، مورال، عىلىم، قۇقىق، يدەولوگيا، ەكونوميكا، ەڭبەك جانە ت.ب.»، «جاس قازاقستاندىقتاردىڭ رۋحاني جاڭعىرۋىنداعى قۇندىلىق باعدارلارى (بازالىق ۇلتتىق رۋحاني قۇندىلىقتار، رۋحاني قۇندىلىقتار جۇيەسىندەگى وزگەرىستەر مەن ساباقتاستىق)»، «ناقتى جاعدايلاردان تۋىندايتىن جاستاردىڭ قوعامدىق ساناسىنىڭ ەلەمەنتتەرى (الەۋمەتتىك ارماندار، بولجامدار، الدىن الا بولجام)»، «جاستاردىڭ جاپپاي ساناسى – كورىنىس، ەرەكشەلىكتەر، رەتتەۋ قۇرالدارى»، «جاستاردىڭ قوعامدىق ساناسىنا جاھاندىق بۇقارالىق كوممۋنيكاسيا قۇرالدارىنىڭ اسەرى (ب ا ق، ينتەرنەت)» تۋراسىنداعى ماسەلەلەر تالقىعا سالىندى.

وتكىزىلگەن كونفەرەنسيانىڭ قورىتىندىسى بويىنشا پلەنارلىق وتىرىستا جانە سەكسيالاردا ۇسىنىلعان باياندامالار تاقىرىپتارى بويىنشا ماقالالار جيناعى شىعارىلدى.