ەل تۇرعىنداردىڭ ساۋلىعىن ارتتىرۋ باعىتىندا ءبىر جىلدارى جاندانعان «دەنساۋلىق» باعدارلاماسىنىڭ بەرەرى مول بولعانى انىق. ودان بولەك، مەملەكەت باسشىسى دا، ەلباسى دا مەديسينالىق نىسانداردى كوپتەپ سالۋدى تاپسىرعانى بەلگىلى. بۇل جۇمىستار جامبىل وبلىسى قورداي اۋدانىندا جۇيەسىن تابۋدا. مۇنى اۋدان اكىمى جۋىردا باعامداپ قايتتى، دەپ جازادى Qamshy.kz اقپارات اگەنتتىگى. 

اۋدان باسشىسى بولاتبەك بايتولە قالعۇتى اۋىلىنا بارىپ، وندا قۇرىلىسى ءجۇرىپ جاتقان جاڭا مەديسينالىق پۋنكتتىڭ جۇمىسىمەن تانىستى. اۋداندىق ورتالىق اۋرۋحانانىڭ باس دارىگەرى زاۋرەش قادىربەكوۆا قۇرىلىس جۇمىستارىنىڭ كوپ ۇزاماي اياقتالاتىنىن ايتىپ، ءىس جوسپارعا سايكەس ءجۇرىپ جاتقانىن جەتكىزدى. سول ماڭدا اۋىل تۇرعىندارىمەن سۇحبات قۇرعان اۋدان باسشىسى قالعۇتىدا بىرنەشە جىلدان بەرى كوتەرىلىپ كەلە جاتقان مەكتەپ ماسەلەسى شەشىمىن تاپقانىن ايتىپ، قۇرىلىس جۇمىستارى قارقىن الاتىنىن جەتكىزدى. وسىدان سوڭ اۋىل تۇرعىندارىنىڭ وتىنىشىمەن اكىم قالعۇتى مەن جامبىل اۋىلىن جالعاپ جاتقان كانال ۇستىنەن وتەتىن كوپىردىڭ جاعدايىن كوردى. تەمىرمەن تارتىلعان جالعىز اياق كوپىردىڭ استىڭعى تىرەۋىشىنىڭ ءبىرى قيسايىپ، ءوزى سولقىلداق كۇيگە تۇسكەن. بۇل جەردەن اۋىل تۇرعىندارى مەن مەكتەپكە قاتىنايتىن بالالار جۇرەتىنى بىلاي تۇرسىن، جايىلىمعا شىعاتىن ءىرى مالدا وسى كوپىرمەن وتەدى ەكەن. ونداعى جاعدايدى كورگەن اۋدان اكىمى كوپىردى رەتكە كەلتىرىپ، ال مالدى باسقا جەردەن وتكىزۋ ءۇشىن جۇمىستاردى قولعا الاتىن بولىپ شەشتى.

قالعۇتىدان كەيىن ستەپنويعا بارعان بولاتبەك بايتولە الدىمەن «قورداي-راۋان» جەكەمەنشىك بالاباقشاسىنىڭ جۇمىسىمەن تانىستى. 150 ورىندىق باقشا بارلىق تالاپقا ساي جاسالعانىمەن، اۋدان باسشىسى بالالاردىڭ ويىن الاڭىنا قاتىستى ءبىرقاتار ەسكەرتۋ جاساپ، ونى بالاباقشا باسشىلىعى جاقىن ارادا رەتكە كەلتىرەتىن بولدى. كەلەسى كەزەكتە ستەپنوي اۋىلدىق مەشىتىنە بارعان اۋدان اكىمى مەشىت ماڭىندى اباتتاندىرۋ مۇلدەم جۇرگىزىلمەگىنىن ايتىپ، رەتكە كەلتىرۋ جۇمىستارىن شۇعىل باستاۋ كەرەكتىگىن ەسكەرتتى. وسىدان سوڭ بولاتبەك بايقونىس ۇلى قۇرىلىسى ءجۇرىپ جاتقان دارىگەرلىك امبۋلاتورياعا بارىپ، مەردىگەرلەرمەن تىلدەستى. عيماراتتىڭ قابىرعاسى كوتەرىلىپ، شاتىرى جابىلعان، قازىرگى تاڭدا سىرلاۋ جۇمىستارى جۇرۋدە. قاراشادا تولىعىمەن اياقتاۋدى كوزدەپ وتىرعان قۇرىلىسشىلارعا ساتتىلىك ايتىلدى. ستەپنوي اۋىلدىق نەگىزگى دارىگەرلىك امبۋلاتورياسىنىڭ ەسكى عيماراتى وتكەن عاسىردىڭ العاشقى جارتىسىندا سالىنعان ەكەن. دەي تۇرعانىمەن، اكتەپ-سىرلاپ، جاقسى قاراۋدىڭ ارقاسىندا وسى كۇنگە دەيىن اۋىلعا ساپالى مەديسينالىق كومەك كورسەتىپ كەلگەن. ەندى كوپ ۇزاماي ونداعى مەديسينا قىزمەتكەرلەرى جاڭا عيماراتقا كوشەتىن بولادى.

وكرۋگ بويىنشا التى مىڭنان استام تۇرعىنى بار ەلدى مەكەندە جول ماسەلەسى ەشقاشان كۇن تارتىبىنەن تۇسكەن ەمەس. سوڭعى جىلدارى ءبىرقاتار اۋىل كوشەلەرى جوندەۋدەن ءوتىپ، ەل يگىلىگىنە بەرىلگەن بولاتىن. دەسە داعى، اۋدان باسشىسى وسى كۇنى ستەپنويداعى بارلىق كوشەلەردى ارالاپ شىعىپ، جاعدايىمەن تانىسىپ، سوڭىندا وكرۋگ اكىمىنە اۋىل سىرتىنا قوقىس تاستاعاندارعا ايىپپۇل سالۋدى قولعا الۋ جانە ونىڭ الدىن الۋ بويىنشا ءبىرقاتار تاپسىرمالار بەردى.