اۋىلداردىڭ اجارىن اشۋ ماقساتىندا جاندانعان «اۋىل - ەلبەسىگىم» مەملەكەتتىك باعدارلاماسىنىڭ بەرەرى مول. سونداي-اق ءبىر كەزدەرى بويىنا قان جۇگىرگەن «100 مەكتەپ، 100 اۋرۋحانا» جوباسىنىڭ دا جۇرتشىلىققا تيگىزگەن پايداسى وراسان. بۇگىندە وسى يگى باعدارلامالاردىڭ جالعاسى رەتىندە قورداي اۋدانىندا يگى تىرلىكتەر اتقارىلۋدا، دەپ جازادى Qamshy.kz اقپارات اگەنتتىگى.  بۇگىندە قالعۇتى جانە كۇنباتىس-2 اۋىلدارىنا بارا قالساڭىز، ەڭ اۋەلى اۋىلداعى اۋىر تەحنيكانىڭ گۇرىلىن ەستيسىز. سەبەبى مۇندا بۇرىن-سوڭدى بولماعان جاڭا مەكتەپ عيماراتتارىنىڭ قۇرىلىسى قارقىن العان. دەمەك، اۋىل تۇرعىنداردىڭ كوپتەن بەرگى كوكەيىندە جۇرگەن ارمان-تىلەكتەرى ورىندالۋدا. اۋدان باسشىلىعىنىڭ باستاماسىمەن اتقارىلىپ جاتقان بۇل ءىستى اۋىل حالقىنىڭ جاعدايىن جاقسارتۋعا باعىتتالعان يگى قادام دەۋگە تولىق نەگىز بار.

– كۇنباتىس-2 اۋىلىندا مەكتەپ اپاتتى جاعدايدا بولسا، قالعۇتى اۋىلىندا ءبىلىم بەرۋ مەكەمەسى مۇلدەم جوق، اۋىل بالاقايلارى ءبىلىم الۋ ءۇشىن بىرنەشە شاقىرىم ءجۇرىپ، جامبىل اۋىلىنا بارىپ وقۋعا ءماجبۇر. وسى ولقىلىقتىڭ ورنى كوپ ۇزاماي تولاعاتىن بولدى. اۋدان باسشىلىعىنىڭ اتسالىسۋىنىڭ ارقاسىندا ىسكە اسقان جۇمىستاردىڭ ءاردايىم باسى-قاسىندا بولامىز، – دەيدى ساۋلەت، قالا قۇرىلىسى جانە قۇرىلىس ءبولىمىنىڭ باسشىسى ە.مەندەكەيەۆ.

– قالعۇتى اۋىلىندا مەكتەپ 180 ورىنعا ارنالعان، جالپى سمەتالىق قۇنى 632 144 مىڭ تەڭگە، مەردىگەر «تەبەردا سترويسەرۆيس» جاۋاپكەرشىلىگى شەكتەۋلى سەرىكتەستىگى، كەلىسىمشارت سوماسى 600 111 مىڭ تەڭگە. 150 ورىندىق كۇنباتىس-2 مەكتەبىنىڭ مەردىگەرى «شۇعىلا-2002» جاۋاپكەرشىلىگى شەكتەۋلى سەرىكتەستىگى، ولارمەن كەلىسىمشارت 588 859،0 مىڭ تەڭگەگە ءتۇزىلدى. العاشىندا ەكى نىسان بويىنشا جوبالىق قۇنى 1 ملرد. تەڭگەگە دەيىن جوسپارلانعان، جوبالاۋ جۇمىستارىن وڭتايلاندىرۋ جانە نىسانداردىڭ ورنالاسۋ جەرلەرىن، اۋماقتارىن، ولشەمدەرىن قايتا قاراۋ ارقىلى بۇل سوما قىسقارىپ، ساراپتامادان ءوتتى. نىسانداردىڭ قۇرىلىسى 2020 جىلدىڭ 1 قىركۇيەگىندە اياقتالادى دەپ جوسپارلانۋدا. جۇمىس ساپاسى تۇراقتى باقىلاۋعا الىنىپ، قۇرىلىس الاڭدارىندا اۆتورلىق جانە تەحنيكالىق قاداعالاۋ جۇرگىزىلۋدە، – دەپ مالىمەتتەرىمەن ءبولىستى ءبولىم باسشىسى.

قازىرگى زامان تالابىنا ساي جاڭا مەكتەپتەردە كەڭ بولمەلەرمەن قاتار ۇلكەن اسحانا، سپورتزال، شەبەرحانا، كىتاپحانا جانە وزگە دە قاجەتتى بولمەلەر قاراستىرىلعان. مەكتەپ ماڭىنا سپورت الاڭى، كىشى سىنىپ وقۋشىلارى ءۇشىن ويىن اۋماقتارى جانە قازاندىق سالىنۋدا.