ۇلتتىق ۇلاننىڭ ساپىندا قىزمەت ەتۋ كوپتەگەن ورەن ءۇشىن مارتەبە. ەل تىنىشتىعىن كۇزەتىپ، قورعان بولۋ ءاربىر ازاماتتىڭ بورىشى. بورىشىن ابىرويمەن وتەپ، بەرگەن انتتارىنا ادال جاندار سىننان ءوتتى.

ق ر تۇڭعىش پرەزيدەنتى، ەلباسى نۇرسۇلتان نازاربايەۆ 2018 جىلعى 5 قازانداعى جولداۋىندا قۇقىققورعاۋ ورگاندارىنىڭ قىزمەتكەرلەرىن اتتەستاسيادان وتكىزۋدى مىندەتتەگەن بولاتىن. وسى ورايدا 5513 اسكەري ءبولىمىنىڭ جەكە قۇرامى ق ر ىشكى ىستەر ءمينيستىرىنىڭ بۇيرىعىمەن ۇلتتىق ۇلان باس قولباسشىسىنىڭ جوسپارىنا سايكەس كەزەكتەن تىس اتتەستاسيادان ءوتتى. ءبىر اپتاعا جۋىق جەكە قۇرام ءوز بىلىمدەرىمەن قاتار اتىس دايارلىعى جانە دەنە شىنىقتىرۋ دايارلىعى بويىنشا سىننان ءوتتى.

–ۇلتتىق ۇلانداعى بۇل سىناقتار – جاۋىنگەرلىك قىزمەت ساپاسىن ارتتىرۋدى، بىلىكتى مامانداردان تولىققاندى كادرلىق رەزەرۆ قۇرۋدى، ءار اسكەري قىزمەتشىنىڭ ىسكەرلىك، تۇلعالىق جانە جەكە قاسيەتتەرىن جان-جاقتى ءارى ءادىل باعالاۋدى، ولاردىڭ كۆاليفيكاسيالىق تالاپتار مەن ءوز لاۋازىمىنا سايكەستىگىن انىقتاۋدى كوزدەيدى. الدىمەن جەك قۇرام «تاراز-ارەنا» سپورت سارايىندا ءتۇرلى نورماتيۆتەر بويىنشا سپورتتىق دايىندىقتارىن سىنادى. سونداي-اق 5513 اسكەري ءبولىمىنىڭ بازاسىندا ۇلاندىقتار بىلىمدەرىن كورسەتۋ ءۇشىن 50 سۇراقتان تۇراتىن تەست تاپسىرىپ، پالەگوندا اتۋ جاتتىعۋى بويىنشا سىننان ءوتتى، – دەدى 5513 اسكەري ءبولىمى كومانديرىنىڭ تاربيە جانە الەۋمەتتىك قۇقىقتىق جۇمىستارى جونىندەگى ورىنباسارى دامير قاسىموۆ.

ءۇش جىلدا ءبىر وتەتىن اتتەستاتسيانىڭ نەگىزگى ماقساتى – قۇقىقتىق ءتارتىپ اسكەرى اسكەري قىزمەتشىلەرىنىڭ قىزمەتىن، ولاردىڭ كاسىبي جانە قىزمەتتىك قابىلەتتەرىن جان-جاقتى ءارى ءادىل باعالاۋ، سونداي-اق كادرلاردى ىرىكتەپ، دۇرىس تاعايىنداۋ. ءۇش نورماتيۆ بويىنشا سىننان وتكەن اسكەريلەر اتىس دايارلىعىنان، ماكاروۆ تاپانشاسىمەن «پايدا بولاتىن نىسانالار بويىنشا ورىننان شاپشاڭ اتۋ»، ال كالاشنيكوۆ اۆتوماتىنان قول پۋلەمەتىنەن جانە كالاشنيكوۆ پۋلەمەتىنەن «پايدا بولاتىن نىسانالار بويىنشا ورىننان اتۋ» جاتتىعۋ شارتتارىن ورىندادى. جىل باسىنان بەرى قىزۋ دايىندىق جۇرگىزگەن شەندىلەر ءاربىر نورماتيۆ بويىنشا جوعارى كورسەتكىش كورسەتۋگە بارىن سالدى.

– بىزگە اتتەستاسيا بولاتىندىعى تۋرالى جىل باسىنان ايتىلدى. بۇگىنگى تاڭدا ءاربىر اسكەريدىڭ دايىندىعى جوعارى دەڭگەيدە. مۇندا جاس ەرەكشەلىگىنە بايلانىستى دا نورماتيۆتەر بولىنەدى. ۇلتتىق ۇلاننىڭ ساربازى كەز كەلگەن ۋاقىتتا فورمادا بولۋ كەرەك. سوندىقتان بىزدەر ءۇشىن بۇل كۇندەلىكتى جۇمىسىمىز ىسپەتتى. اتتەستاسيادان ءوتۋ اسا ءبىر قيىندىق تۋعىزادى دەپ ايتا المايمىن، – دەيدى №5513 اسكەري ءبولىمى شتابىنىڭ مامانى جانار سادۆاكاسوۆا.

بىرنەشە كۇنگە سوزىلعان اتتەستاسيالاۋدان سۇرىنگەن شەندىلەر ءۇشىن تاعى ءبىر مۇمكىندىك بەرىلەدى ەكەن. ءبىراق ول كەزەڭنەن دە سۇرىنگەن ۇلاندىق جۇمىستان بوساتىلادى.