كوپبالالى جانە تۇرمىسى تومەن وتباسىلاردىڭ الەۋمەتتىك جاعدايىن جاقسارتۋعا جول اشقان اتاۋلى الەۋمەتتىك كومەكتىڭ شاراپاتىن اتالعان ساناتقا جاتاتىن مەركىلك جانۇيالار دا ايقىن سەزىنۋدە. اعىمداعى جىلدىڭ ءساۋىر ايىنان بەرى مەركى اۋدانىندا 4000-عا جۋىق وتباسىعا كومەكتىڭ ءدال وسى ءتۇرى تاعايىندالعان، دەپ جازادى Qamshy.kz اقپارات اگەنتتىگى.
اۋدانداعى الەۋمەتتىك جاعدايى تومەن كوپبالالى وتباسىلارعا اتاۋلى الەۋمەتتىك كومەكتى تاعايىنداۋعا بيۋدجەتتەن 1 ميلليارد 920 ميلليون 500 قاراستىرىلعان. اعىمداعى جىلدىڭ 10 ايىنداعى مالىمەت اۋىلدىق وكرۋگتەر بويىنشا 17261 مۇشەسى بار 3619 مەركىلىك وتباسىدان الەۋمەتتىك كومەك تاعايىنداۋعا قۇجاتتار قابىلدانعانىن كورسەتەدى. مۇنداعى 3327 وتباسىعا كومەك شارتتى نەگىزدە ال 292 وتباسىنا شارتسىز اقشالاي كومەك بەرىلدى. سونداي-اق الەۋمەتتىك قولداۋعا ءزارۋ جەرگىلىكتى تۇرعىندارعا 200 مىڭ تەڭگە كولەمىندە قارجىلاي كومەك كورسەتىلدى. بۇل مۇمكىندىكتى 10 وتباسىنداعى 74 مەركىلىك سەزىندى.
سونىمەن قاتار وڭىردە جەرگىلىكتى ۋاكىلەتتى ورگانداردىڭ شەشىمدەرىمەن بەلگىلى ءبىر ساناتقا جاتاتىن تۇرعىندارعا دا الەۋمەتتىك كومەك كورسەتۋ شارالارىنا دا بيۋدجەتتەن قارجى قارالىپ ماقساتتى يگەرىلگەن. اتاپ ايتقاندا بۇل باستاما اياسىندا 165 ادامعا جالپى سوماسى 5 ميلليارد 605 ميلليون تەڭگەگە جاردەم اقى تولەنگەن. مۇنان بولەك مۇگەدەك بالالاردى ۇيدە وقىتۋعا جۇمسالعان شىعىنداردى وتەۋگە 96 وتباسىنداعى 99 بالاعا 3 ميلليارد 711 ميلليون تەڭگە تولەندى. الەۋمەتتىك قولداۋ شارالارىن اۋدانعا قاراستى ەلدى مەكەندەردە جۇمىس جاسايتىن الەۋمەتتىك سالا ماماندارى دا شەت قالمايدى. اعىمداعى جىلى ولاردىڭ تۇرعىن ۇيلەرىن جىلىتۋعا قاجەتتى وتىن ساتىپ الۋعا 28 ميلليون تەڭگە بيۋدجەت قارجىسى جۇمسالدى.
جالپى بۇگىندە اۋداندا 2564 مۇمكىندىگى شەكتەۋلى جان بار. سايكەسىنشە ولاردىڭ جاي-كۇيى، قاجەتتىلىكتەرىن وتەۋ جۇمىستارى جەرگىلىكتى بيلىكتىڭ ءجىتى نازارىنا الىنعان. اتاپ ايتقاندا مۇگەدەكتەردى وڭالتۋ باعدارلاماسىنا ساي ولاردى گيگيەنالىق قۇرالدارمەن جانە لوگوپەد، دەفەكتولوگ ماماندارمەن، جەكە كومەكشىلەرمەن قامتاماسىز ەتۋ ماقساتىندا 34،1 ميلليون تەڭگە يگەرىلدى. سونداي-اق 17-الەۋمەتتىك قىزمەتكەر 96 مۇمكىندىگى شەكتەۋلى مۇگەدەكتىڭ ۇيىندە ولارعا الەۋمەتتىك قىزمەتتەردىڭ 8 ءتۇرى بويىنشا قىزمەت كورسەتۋدە. مۇمكىندىگى شەكتەۋلى جاندارعا قولايلى ورتا جاساۋ ماقساتىندا بەيىمدەلۋگە جاتاتىن 12 مەكەمەنىڭ جەتەۋىندە بەيىمدەۋ جۇمىستارى جۇرگىزىلدى.
