سوڭعى توعىز جىل بويى جۇرگىزىلگەن دياگنوستيكالىق تالداۋلار ناتيجەسى جامبىل وڭىرىندە مالداردىڭ سوزىلمالى برۋسەللەز اۋرۋىنا شالدىعۋ كورسەتكىشىنىڭ 83 پايىزعا تومەندەگەنىن كورسەتەدى. سونىمەن قاتار جەرگىلىكتى تۇرعىنداردىڭ دا مالدان جۇعاتىن ءدال وسى وسۋ اۋرۋعا شالدىققاندار سانى دا 255 ادامعا كەمىگەن، دەپ جازادى Qamshy.kz اقپارات اگەنتتىگى.  

تارقاتىپ ايتار بولساق 2010 جىلى 3025 باس ءمۇيىزدى ءىرى قارانى برۋسەللەز دەرتى دەندەسە، اعىمداعى جىلدىڭ باسىنان بەرى نەبارى 397 باس ءمۇيىزدى ءىرى قارا وسىناۋ اۋرۋعا شالدىققان. ال 9 جىل بۇرىن اۋرۋ 10 066 باس ۋاق مالدى دەرتتى ەتكەن. سايكەسىنشە ءتيىستى شارالار ارقاسىندا اعىمداعىجىلدىڭ 9 ايىندا 1750 ۇساق مالدىڭ برۋسەللەزبەن اۋىرعانى بەلگىلى بولدى.

جالپى بيىل وڭىردەگى ەپيزووتيالىق ءىس-شارالاردى جۇرگىزۋگە رەسپۋبليكالىق بيۋدجەتتەن 1ميلليارد 500 ميلليون قارجى بولىنگەن. بۇل وتكەن جىلمەن سالىستىرعاندا 13،3 پايىزعا ارتىق.

–رەسپۋبليكالىق بيۋدجەتتەن بولىنگەن قاراجات تولىعىمەن اۋداندارعا ءبولىنىپ بەرىلدى. ولار بۇل قارجىعا قاجەتتى ۆاكسينالار تولىقتاي الىندى. ەكپە جۇمىستارىنا قاجەتتى نەمەسە ودان ارتىلعان كەيبىر ۆاكسينالار ۆەتەريناريالىق كاسىپورىنداردىڭ ۆاكسينانى ۋاقىتشا ساقتايتىن قويمالارىندا ساقتاۋلى تۇر.

بۇگىندە وبلىستا جانۋارلاردىڭ اسا ءقاۋىپتى اۋرۋلارىنا قارسى ۆاكسيناسيا جانە اللەرگيالىق زەرتتەۋلەر 13 اۋرۋدىڭ ءتۇرى بويىنشا، دياگنوستيكالىق زەرتتەۋلەر 23 اۋرۋدىڭ ءتۇرى بويىنشا ەپيزووتياعا قارسى جوسپارلى ءىس-شارالار جۇرگىزىلىپ جاتىر،–دەيدىوبلىس اكىمدىگىنىڭ ۆەتەريناريا باسقارماسىنىڭ باسشىسى وسپان بەردياروۆ.

ەپيزووتيالىق احۋالدى باقىلاۋدا ۇستاۋ ماقساتىندا رەسپۋبليكالىق بيۋدجەتتەن بولەك وبلىستىق بيۋدجەتتەن دە 388 ميلليون تەڭگە ءبولىندى. بۇل قارجى دا ماقساتتى يگەرىلىپ ءمۇيىزدى ءىرى قارا مالدىڭ تەيلەريوز اۋرۋىنا، جىلقىنىڭ ساقاۋىنا جانە اۋىل شارۋاشىلىعى مالدارىنىڭ سالمونەللەز اۋىرۋىنا قارسى ەگىلەتىن ۆاكسينالار ساتىپ الۋعا جۇمسالدى.

ءبىر سوزبەن ايتقاندا وڭىردەگى ەپيزووتيالىق احۋال تۇراقتى. بۇل ورايدا وسى قىزمەتكە جاۋاپتى ۆەتەرينارلىق قىزمەتتەردىڭ جۇمىسىنداعى جۇيەلىلىكتى اتاپ وتكەن ءجون. سالا ماماندارى اۋرۋعا ۇشىراعان مالدەرەۋ وقشاۋلانىپ، مەملەكەتتىك ۆەتەرينارلىق ينسپەكتوردىڭ قاداعالانۋىمەن وڭدەۋ ورىندارىنا جىبەرىلەدى. ءوز كەزەگىندە وڭدەۋ ورىندارى شارۋالارعمال قۇنىنىڭ 70 پايىزىن تولەپ بەرەدى.