كوپ بالالى انالار مەن الەۋمەتتىك جاعدايى تومەن وتباسىلاردى باسپانامەن قامتۋ ماسەلەسى قاشاندا وزەكتى.مەملەكەتتىك باعدارلاما ەسەبىنەن باسپانالى بولۋعا تابىس تومەن، ءارى العاشقى جارنانى تولەۋگە قابىلەتسىز جاندارعا باسپانالى بولۋى باقىتىن سەزىندىرۋ ماقساتىندا وڭىردە وبلىس اكىمىنىڭ باستاماسىمەن 612 پاتەرلى 12 جاتاقحانانىڭ قۇرىلىسى جۇرگىزىلىپ جاتىر، دەپ جازادى Qamshy.kz اقپارات اگەنتتىگى.
جالپى قۇنى 2 ميلليارد 400 ميلليون تەڭگە بولاتىن 12 جاتاقحانانىڭ 9-نىڭ قۇرىلىسى اعىمداعى جىل سوڭىنا دەيىن اياقتالىپ 478 وتباسىعا پاتەر كىلتى تاپسىرىلاتىن بولادى. قالعان 134 پاتەرلى 3 جاتاقحانا كەلەر جىلى پايدالانۋعا بەرىلمەك.
نەگىزىنەن وڭىردە بيۋدجەت قاراجاتى ەسەبىنەن بيىل 2 195 ادامدى باسپانامەن قامتاماسىز ەتۋ جوسپارى بار.مۇندا «نۇرلى جەر» مەملەكەتتىك باعدارلاماسىنىڭ قوسار ۇلەسى قوماقتى بولماق. اتالعان باعدارلاما اياسىندا جالپى قۇنى 11 ميلليارد 900 ميلليون تەڭگە بولاتىن 2118 پاتەرلى 30 تۇرعىن ءۇيدىڭ قۇرىلىسى جۇرگىزىلىپ جاتىر. بۇل تۇرعىن ءۇيدىڭ 26-سى تاراز قالاسىندا سالىنىپ جاتسا، قالعان تورتەۋى سارىسۋ، قورداي، جامبىل اۋداندارىندا بوي كوتەرۋدە. سونىمەن بىرگە رەسپۋبليكالىق بيۋدجەت ەسەبىنەن 1 ميلليارد 600 ميلليون تەڭگە قارجى قاراستىرىلىپ كوپبالالى وتباسىلارعا ارنالعان 209 پاتەر ساتىپ الۋ جوسپارى بار. بۇگىنگى تاڭعا دەيىن 186 پاتەر ساتىپ الىنىپ قويىلدى.
جالپى نۇرلى جەر» مەملەكەتتىك باعدارلاماسىمەن بولىنگەن قارجىنىڭ 3 ميلليارد 900 ميلليون تەڭگەسى 658 پاتەرلىك 9 ارەندالىق تۇرعىن ءۇيدىڭ قۇرىلىسىنا قارالعان. ال 8 ميلليارد تەڭگە 1460 پاتەرلىك 21 كرەديتتىك تۇرعىن ۇيگە جۇمسالعان.
جەرگىلىكتى تۇرعىنداردىڭ باسپانا ماسەلەسىن شەشۋدە جەكە ينۆەستورلار دا اتسالىسۋدا.ماسەلەن تاراز قالاسىندا 4 جەكە ينۆەستور ءوز قاراجاتتارى ەسەبىنەن 523 پاتەرلى 10 تۇرعىن ءۇيدىڭ قۇرىلىسىن جۇرگىزۋدە. مۇنداعى 89 پاتەرلى 2 تۇرعىن ۇيدە جىل سوڭىنا دەيىن قونىستويى تويلاناتىن بولادى.
قالاي دەسەكتە ءتۇرلى قاراجات كوزدەرى ارقىلى تۇرعىنداردى باسپانامەن قامتۋعا ايرىقشا كوڭىل بولگەن جەرگىلىكتى بيلىكتىڭ لايىقتى قادامى سۇيسىنتەدى. ۋاقىتشا نەمەسە ارەندالى باسپاناعا يەلىك ەتكەن تۇرعىندار جالدامالى پاتەردىڭ اقىسىنا جۇمسالاتىن شىعىندى ءوز پاتەرىنىڭ العاشقى جارناسىن جيناۋعا باعىتتاۋدا. باستىسى بۇل شارانىڭ بارلىق دەرلىك جامبىدىقتاردىڭ الەۋمەتتىك الەۋەتىن ارتتىرۋ ماقساتىندا جۇرگىزىلىپ جاتقانى داۋسىز.
