گەوگرافيالىق ورنالاسۋى مەن تابيعات جاعدايى ەگىن شارۋاشىلىعىنا قولايلى مەركى اۋدانىندا سوڭعى جىلدارى بۇل سالا سەرپىندى دامىپ كەلەدى. اسىرەسە ەگىستىك القاپتارىن ۇلعايتۋ، ەگىلەتىن داقىلداردىڭ ءارالۋاندىعى سىندى كورسەتكىشتەر كوڭىل قۋانتادى، دەپ جازادى Qamshy.kz اقپارات اگەنتتىگى. 

بۇگىندە اۋدانداعى ەگىستىك جەردىڭ كولەمى جالپى كولەمى 100 176 گەكتار بولسا، ونىڭ 20474 گەكتارى سۋارمالى القاپقا تيەسىلى. اعىمداعى جىلى ايماقتاعا 76 446 گەكتار القاپقا اۋىل شارۋاشىلىعى داقىلدارىن ەگۋ جوسپارلانعان. ءوز كەزەگىندە كوكتەمگى دالا جۇمىستارىن جۇيەلى ۇيىمداستىرۋ ناتيجەسىندە ەگىس القابى 14 400 گەكتار ۇلعايتىلدى. وسىلايشا مەركىلىك شارۋالار اۋىل شارۋاشىلىق داقىلدارىن ەگۋ بويىنشا قويىلعان مەجەنى 18،7 پايىزعا اسىرا ورىندادى.

مۇندا نەگىزىنەن جازدىق ارپانىڭ ەگۋ جوسپارى 3000 گەكتارعا، جوڭىشقا القابىنىڭ كولەمى 1600 گەكتارعا، كوكونىس القابىنىڭ كولەمى 600 گەكتارعا ۇلعايعان. سونداي-اق، كارتوپ، جۇگەرى، مايلى داقىلدارىن ەگۋ جوسپارى دا 3-4 ەسەگە اسىرا ورىندالعان. اعىمداعى جىلى مەركىلىك شارۋالار 25684،7 گەكتار القاپقا كۇزدىك بيداي ەكسە، 23 201 گەكتار اۋماققا كوپ جىلدىق ءشوپتىڭ تۇقىمىن سەپكەن.

وسىناۋ مول القاپتاردان الىنعان تۇسىمدە جوعارى بولدى. جاقىندا عانا اياقتالعان كۇزگى ەگىس جۇمىستارىنىڭ ناتيجەسىندە 52 052 گەكتار استىقتى داقىل تۇرلەرىنەن 131 173،2 توننا استىق باستىرىلدى. شامامەن ءار گەكتارىنان 25،2 سەنتنەردەن ءونىم جينالدى. تارقاتىپ ايتار بولساق 25 684 گەكتار كۇزدىك بيدايدان 54 705،5 توننا ءونىم جينالدى. كۇزدىك بيدايدىڭ ءار گەكتارعا شاققانداعى ءتۇسىمى 21،3 سەنتنەردەن اينالدى. سول سەكىلدى 26368 گەكتار جازدىق ارپادان 76464،7 توننا ءونىم جينالىپ، ورتاشا گەكتار قايتارىمى 29 سەنتنەردى قۇرادى.

جالپى مەرەيلى مەركى وڭىرىندە سوڭعى جىلدارى ەگىن شارۋاشىلىعى ەرەكشە ەكپىنمەن دامىپ كەلەدى. ءبىر عانا قانتقىزىلشاسىن ەگۋدە مەركىلىك ديقانداردىڭ تابىس قازانىن قايناتىپ وتىرعانى كوپكە ۇلگى. بيىل اۋدان اۋماعىندا 2000 گەكتار قانت قىزىلشاسى ەگىلگەن. كۇنى بۇگىنگە دەيىن 105 گەكتار ءتاتتى ءتۇبىر القابىنان جينالعان ءونىم كولەمى 4650 تونناعا جەتتى. بۇل دەگەنىڭىز گەكتارعا شاققانداعى ورتاشا ونىمدىلىك 442،8 سەنتنەردەن اينالىپ وتىرعاندىعىن كورسەتەدى.

ەگىن شارۋاشىلىعىنداعى مول ءتۇسىمنىڭ تاعى ءبىر سەبەبى رەتىندە ايماقتاعى ەگىس القاپتارىنا تامشىلاتىپ سۋعارۋ تەحنولوگيالارىنىڭ ەنگىزىلۋىن العا تارتۋعا بولادى. وتكەن جىلى مۇنداي جاڭاشىلدىق بيىل 2374 گەكتار القاپقا ەنگىزىلدى.