جۋالى اۋدانىنداعى №9 اباي اتىنداعى ورتا مەكتەپتىڭ ديرەكتورى جانار وتەگەنوۆا، ديرەكتوردىڭ تاربيە ءىسى جونىندەگى ورىنباسارى ەسىمجان تولەۋىشوۆتىڭ باس بولۋىمەن، سونىمەن بىرگە بىرلىگى بەكەم مەكتەپ ۇجىمىنىڭ اتسالىسۋىمەن اباي قۇنانباي ۇلىنىڭ 175 جىلدىعىنا ورايلاستىرىلىپ «اسىل ءسوزدىڭ الداسپانى» تاقىرىبىندا ۇلكەن ءىس-شارا جوعارى دەڭگەيدە ۇيىمداستىرىلدى. ۇلى اقىننىڭ ونەگەلى ومىرىمەن تانىستىرۋ، اقىننىڭ دانالىعىن، رۋحاني اسىل مۇرالارىن ناسيحاتتاپ، ولەڭدەرى مەن مۋزىكالىق مۇرالارىن قايتا جاڭعىرتىپ، ناسيحاتتاۋ – شارانىڭ نەگىزگى ماقساتى بولىپ تابىلادى.

مەرەيتويلىق ءىس-شارانى مەكتەپتىڭ ديرەكتورى جانار وتەگەنوۆا اشىپ، اباي مۇرالارى تۋرالى ايتىپ، شارانىڭ ماڭىزدىلىعىنا از-كەم توقتالدى. كەلەسى كەزەكتە ءسوز سويلەگەن قوشقاراتا اۋىلدىق وكرۋگىنىڭ اكىمى جانىبەك مىرزالييەۆ ۇلى اقىننىڭ ەسىمىن يەلەنگەن ءبىلىم وشاعىنىڭ شاكىرت تاربيەلەۋدەگى ەڭبەگىنە تابىس تىلەي وتىرىپ، مەكتەپكە اباي قۇنانباي ۇلىنىڭ كىلەمگە بەينەلەنگەن پورترەتىن تارتۋ ەتتى. اۋدان اكىمدىگى ءبىلىم ءبولىمىنىڭ باس مامانى ۇزاقباي قۇرمانبايەۆ، اۋداندىق مادەنيەت جانە تىلدەردى دامىتۋ ءبولىمىنىڭ باس مامانى فاريزا ورازىمبەتوۆا اباي مۇرالارىنىڭ ماڭگىلىك ەكەنىن، سونىمەن بىرگە باسقا دا ەڭبەكتەرىنىڭ جاس ۇرپاققا بەرەرى مول ەكەنىن باسا ايتتى. ايتا كەتۋ كەرەك، اقىننىڭ تويىنا اۋدان مەكتەپتەرى ديرەكتورلارىنىڭ ورىنباسارلارى دا ارنايى كەلىپ، شارانى تاماشالادى.

ۇلى ويشىلدىڭ 175 جىلدىعىنا ارنالعان شارا مەكتەپتىڭ اكت زالىندا «ولەڭ – ءسوزدىڭ پاتشاسى، ءسوز ساراسى» اتالاتىن بولىممەن جالعاسىن تاپتى. كەش بارىسىندا ولەڭ مەن قارا سوزگە جاقىن مەكتەپتىڭ ءبىرقاتار وزات وقۋشىلارى اباي ولەڭدەرىن مانەرلەپ، جاتقا وقىدى. ال اۋداندىق، وبلىستىق جىر دودالارى، سونىمەن بىرگە «جامبىل – مەنىڭ جاي اتىم، حالىق – مەنىڭ شىن اتىم!» اتتى رەسپۋبليكالىق ايتىستىڭ، سونىمەن بىرگە ازىمبەك جانقۇلييەۆ اتىنداعى وبلىستىق جاس اقىندار ايتىسىنىڭ جۇلدەگەرى اۋەسحان ۇركىمبايەۆ ۇلى اقىنعا ارناعان ولەڭىن وقىپ بەرىپ، قارا دومبىرامەن ءان اۋەلەتتى. «كوڭىلىم ءاندى ۇعارسىڭ…» بولىمىندە ابايدىڭ «كوزىمنىڭ قاراسى»، «جەلسىز تۇندە جارىق اي» اندەرى جاندى داۋىستا ورىندالدى.

اباي قۇنانباي ۇلىنىڭ 175 جىلدىعىنا ورايلاستىرىلىپ «اسىل ءسوزدىڭ – الداسپانى» تاقىرىبىنداعى ءىس-شارانىڭ ۇيىمداستىرىلۋى مەن ءوتۋ بارىسىن باسىنان-اياعىنا دەيىن تاماشالاعان اۋداندىق ءبىلىم ءبولىمىنىڭ جاۋاپتى ماماندارى جوعارى باعالاپ، مەكتەپ ۇجىمىنىڭ جۇمىسىنا ساتتىلىك پەن تابىس تىلەدى. №9 اباي اتىنداعى ورتا مەكتەپتىڭ ديرەكتورى جانار وتەگەنوۆا اباي قۇنانباي ۇلىنىڭ 175 جىلدىق مەرەيتويىنا ارنالعان ءىرىلى-ۇساقتى شارالاردىڭ الداعى ۋاقىتتا دا جالعاسىن تاباتىنىن، وقۋ كابينەتىنەن ۇلى اقىنعا ارنالىپ مۋزەي جاساقتالىپ جاتقانىن قۋانىشپەن جەتكىزدى.