جاقىندا جامبىل وبلىسى جۋالى اۋدانىنىڭ جەتىتوبە اۋىلدىق وكرۋگىنە قاراستى كارىقورعان اۋىلىنىڭ فۋتبول الاڭىندا اۋداندىق ءماسليحاتتىڭ دەپۋتاتى، اۋدان ورتالىعىنداعى د.قونايەۆ اتىنداعى مەكتەپ-گيمنازيانىڭ ديرەكتورى گۇلنار مۇساحانوۆانىڭ دەمەۋشىلىگىمەن كىشى فۋتبولدان جارىس ءوتتى. جارىس وكرۋگ اكىمدىگىنىڭ مۇرىندىق بولۋىمەن ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا ۇيىمداستىرىلدى.

دوداعا مەكتەپ وقۋشىلارى مەن قىزمەتكەرلەرىنەن قۇرالعان ت.اكىموۆ اتىنداعى ورتا مەكتەپتىڭ كومانداسى، اۋداندىق №12 بالالار مەن جاسوسپىرىمدەر سپورت مەكتەبىنىڭ باپكەرلەرىنەن قۇرالعان كوماندا، اۋدانىمىزدىڭ نامىسىن وبلىستىق جارىستاردا قورعاپ جۇرگەن «جۋالى ارداگەر» جانە «جۋالى گاز» مەكەمەلەرىنىڭ كوماندالارى قاتىستى. ءار كوماندانىڭ جاسايتىن قىزمەتتەرى دە، سونىمەن قاتار جاستارى دا ءارتۇرلى.

جارىس الدىندا وكرۋگتەگى اقساقالدار القاسىنىڭ ءتوراعاسى راحىمجان ساتايەۆ گۇلنار ماحامبەت قىزىنىڭ ومىربايانىمەن تانىستىرا كەلە، ونىڭ كەزىندە وكرۋگىمىزدىڭ ەكى مەكتەپ ۇجىمىن ابىرويمەن باسقارعانىن جانە دە دەپۋتات رەتىندە كەلەشەكتە دە ناتيجەلى جۇمىستاردى بىرلەسە اتقارا بەرەتىندىگىنە سەنىم ءبىلدىردى.

گۇلنار مۇساحانوۆا ەل سەنىمىن ۇلكەن جاۋاپكەرشىلىكپەن اقتاۋ – ءوزىنىڭ ومىرلىك ۇستانىمى ەكەنىن، سايلاۋشىلارىمەن تىعىز قارىم-قاتىناستا بولا بەرەتىندىگىن ايتا كەلە، جارىسقا جينالعان اۋىل تۇرعىندارىنا ىستىق ىقىلاسىن ءبىلدىرىپ، شەكسىز العىسىن جەتكىزدى.

جارىس وتە تارتىستى ءوتتى. ءى ورىندى«جۋالى گاز» مەكەمەسىنىڭ كومانداسى، ءىى ورىندى ت.اكىموۆ اتىنداعى ورتا مەكتەپتىڭ كومانداسى، ءىىى ورىندى «جۋالى ارداگەر» كومانداسى مەن №12 بجسم باپكەرلەرىنىڭ كومانداسى يەلەندى. ءبىر ايتا كەتەرلىگى، ءتورت كوماندا دا اقشالاي سىيلىقپەن ماراپاتتالسا، كوماندالاردىڭ بارلىق مۇشەلەرىنە «تويدان توبىقتاي» دەمەكشى، تۇگەلدەي دەرلىك سىيلىقتار تابىستالدى.

جارىس سوڭىندا اۋىل اقساقالدارى مەن كوماندا مۇشەلەرىنە تاماق بەرىلىپ، اياقدوپ شەبەرلەرى وسىنداي جارىستاردى ۇيىمداستىرۋ بولاشاقتا دا داستۇرگە اينالا بەرسىن دەگەن تىلەكپەن تارقاستى.

«ەل ءۇمىتىن ەر اقتار»

ەر اتاعىن ەل ساقتار» – دەپ، حالىق ايتسا قالىپ ايتپايتىنىنداي، گ. مۇساحانوۆا دەپۋتاتتىق قىزمەتىندە ەل ىشىندەگى ماسەلەلەردى شەشۋمەن عانا ەمەس، وسىنداي ءتۇرلى شارالاردى وتكىزۋگە دە ارناپ كەلەدى.

– ءماسليحاتتارداعى دەپۋتاتتاردىڭ جۇمىسى اسقان جاۋاپكەرشىلىكتى تالاپ ەتەدى، ءاربىر وكرۋگتەن سايلانعان حالىق قالاۋلىسى ءوز اۋماعىندا تۇراتىن تۇرعىنداردىڭ مۇددەلەرىن ءتيىستى دەڭگەيدە قورعاي ءبىلۋى قاجەت. جۋالىلىق دەپۋتاتتار بۇل ۇدەدەن شىعا الىپ ءجۇر دەۋگە تولىق نەگىز بار. ءار حالىق قالاۋلىسى ۋاقىتىلى ازاماتتاردى قابىلداپ، ءوز سايلاۋشىلارىنىڭ وتىنىشتەرىنە قۇلاق اسىپ تۇرادى. دەپۋتاتتاردىڭ باسىم كوپشىلىگى مەكەمەلەر مەن كاسىپورىنداردىڭ باسشىلارى بولعاندىقتان، ولار كۇن سايىنعى تىرلىگىندە دە تۇرعىندارمەن تىعىز بايلانىستا جۇمىس جاسايدى، – دەيدى ول.