مەملەكەت باسشىسى قاسىم-جومارت توقايەۆ «سىندارلى قوعامدىق ديالوگ-قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا اگروونەركاسىپ كەشەنىن دامىتۋ ماسەلەسىنەن باسا نازار اۋدارعانى بەلگىلى.

بۇل تۇرعىدا پرەزيدەنت: «اۋىل شارۋاشىلىعى – ءبىزدىڭ نەگىزگى رەسۋرسىمىز، ءبىراق ونىڭ الەۋەتى تولىق پايدالانىلماي وتىر.

ەل ىشىندە عانا ەمەس، شەتەلدە دە سۇرانىسقا يە ورگانيكالىق جانە ەكولوگيالىق تازا ءونىم ءوندىرۋ ءۇشىن زور مۇمكىندىكتەر بار.

ءبىز سۋارمالى جەر كولەمىن كەزەڭ-كەزەڭمەن 2030 جىلعا قاراي 3 ميلليون گەكتارعا دەيىن ۇلعايتۋىمىز كەرەك.

بۇل اۋىل شارۋاشىلىعى ءونىمىنىڭ كولەمىن 4،5 ەسە ارتتىرۋعا مۇمكىندىك بەرەدى.

ساۋدا جانە ينتەگراسيا، اۋىل شارۋاشىلىعى مينيسترلىكتەرى فەرمەرلەرگە ءوز ءونىمىن سىرتقا شىعارىپ ساتۋ ءۇشىن بارىنشا قولداۋ كورسەتۋى ءتيىس.

وسىعان وراي ۇكىمەتكە ءتيىستى تاپسىرما بەرىلدى. بۇل – ماڭىزدى مىندەت،

اۋىل شارۋاشىلىعى ءونىمىن ەكسپورتتاۋ ىسىندە شيكىزاتقا نەگىزدەلۋدەن باس تارتۋ كەرەك» دەپ اتاپ كورسەتتى.

مەملەكەت باسشىسى ءمان بەرگەن مىندەتتەر جامبىل وبلىسىندا داكەزەڭ –كەزەڭىمەن ىسكە اسىرىلاتىن بولادى.

جالپى، اۋىل شارۋاشىلىعى سالاسى ەلىمىزدىڭ ەكونوميكاسىن العا سۇيرەيتىن ماڭىزدى سالا. ياعني، سالانىڭ اتقارار جۇگى دە اۋىر. اۋىل شارۋاشىلىعى سالاسىندا قىزمەت ەتەتىندەر نەگىزىنەن اۋىل ادامدارى. ەڭبەكقور، ءتوزىمدى، ءوز جۇمىسىن جاقسى كورەتىن جاندار. وسىنداي ەڭبەكقور جاننىڭ ءبىرى – جۋالى اۋدانى، ديقان اۋىلىنىڭ تۇرعىنى باۋىرجان جۇمانوۆ. «باۋىرجان» شارۋا قوجالىعىنىڭ جەتەكشىسى «التىن القالى» اياۋلى انا سەيسەكۇل جۇمانوۆا. شارۋا قوجالىقتى 2003 جىلى وتاعاسى ءابدىل جۇمانوۆ قۇرعان. مارقۇم ءابدىل جۇمانوۆ ناعىز ەڭبەك ادامى بولعان جان. اكە جولىن قۋعان بالا جۇمىستى جۇيەلەپ، ءارى قاراي الىپ كەتتى. بۇگىنگى تاڭدا باۋىرجان مال فەرماسىندا 30 باس ساۋىندى سيىر مەن ءتورت جىلقى اسىراپ وتىر. باۋىرجان جارى ينديرا ەكەۋى ەكى ۇل، ەكى قىز تاربيەلەپ وتىر. ينديرانىڭ ماماندىعى - ءمۇعالىم. بۇگىنگى تاڭدا دەكرەتتىك دەمالىستا وتىرعان ينديرا جولداسىنىڭ كومەكشىسى. وتباسى بولىپ جۇمىلا ەڭبەك ەتكەن باۋىرجان مەن ينديرانىڭ ەڭبەگى كوپكە ۇلگى. ءيا، ومىردە اكەسىنىڭ جولعا قويىپ بەرگەن شارۋاسىن الىپ كەتە الماي، تالان-تاراجعا ءتۇسىرىپ جاتقان ازاماتتار از ەمەس. ال اكە جولىن قۋىپ، تالماي ەڭبەك ەتىپ، ءارى قاراي دامىتىپ، ءار نارسەنىڭ قادىرىنە جەتە بىلەتىن جاستار دا كەزدەسەدى. وسى تۇرعىدان كەلگەندە باۋىرجانداي ەڭبەكقور ازاماتتىڭ ەڭبەگىنە تەك قانا تابىس پەن ابىروي تىلەيمىز. ادام بالاسىن تەك ادال ەڭبەك قانا باياندى باقىتقا بولەيدى.