مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا ايقىنداپ بەرگەن ماڭىزدى مىندەتتەرگە سايكەس، جامبىل وبلىسىندا اگروونەركاسىپ كەشەنىن دامىتۋ ءىسى قارقىن الا باستادى. ايماقتا مەملەكەت قولداۋىنىڭ ناتيجەسىندە ءوز ءىسىن دوڭگەلەنتىپ وتىرعان شارۋالار از ەمەس. سولاردىڭ قاتارىندا تالاس اۋدانىنداعى ءۇشارال اۋىلدىق وكرۋگى ەڭبەككەرلەرىنىڭ دە تىندىرىمدى تىرلىگى تۋرالى اۋىز تولتىرىپ ايتۋعا بولادى.

جالپى اتالعان اۋىلدىڭ ءتورت تۇلىكتى تۇلەتۋگە ىڭعايلى جەر ەكەنى بەسەنەدەن بەلگىلى. ولاي دەيتىنىمىز، اۋىل ىرگەسى 1930 جىلى اسىل تۇقىمدى قاراكول قويىن وسىرەتىن «تالاس» كەڭشارىنىڭ ورتالىعى رەتىندە قالانعان. سول ۋاقىتتان بەرى اتا كاسىپكە ادالدىق تانىتىپ كەلە جاتقان بۇگىنگى حالىق مال شارۋاشىلىعىنان اينىعان ەمەس. بۇل ورايدا، «جامبىل وبلىسى تۇرعىندارىنىڭ تۇرمىستىق تابىسىن ارتتىرۋ» جوباسىنىڭ ەكىنشى باعىتى بويىنشا اۋىلدىق وكۋرگتە 170 ادام نيەت تانىتىپ وتىر ەكەن. اتالعان باعىت اياسىندا مال وسىرۋگە جانە بورداقىلاۋعا مۇمكىندىكتەر قاراستىرىلعان. دەگەنمەن ءۇشارالدىقتاردىڭ بارلىعى ءتورت تۇلىكتى وسىرۋگە بەت بۇرىپ وتىرعان كورىنەدى. نەگىزىنەن جوباداعى كورسەتىلگەن ەرەجەلەر بويىنشا ءبىر قولعا 5 سيىر، 10 جىلقى، 15 بۇقاشىق قانا الۋعا بولادى. قازىرگى تاڭدا نيەت ءبىلدىرۋشى 170 ازاماتتىڭ قۇجاتتارى «تاراز» الەۋمەتتىك كاسىپكەرلىك كورپوراسياسىنا جىبەرىلىپتى. الداعى ۋاقىتتا كورپوراسيا تاراپىنان قارجى بولىنەتىن بولسا، تۇرعىندار قوراسىنداعى تۇلىك سانىپ ارتتىرىپ، توسكەيدى مالعا تولتىرماق. ول ءۇشىن اۋىلدا جايىلىم جەر دە جەتەدى ەكەن.

– راسىندا، ەگىن شارۋاشىلىعىمەن قاتار مال شارۋاشىلىعىن دامىتۋ ءۇشىن دە سۋارمالى جەر قاجەت ەكەنى بەلگىلى. شىندىعىن ايتار بولساق، بىزدە سۋ تاپشىلىعى سەزىلەتىندىكتەن جوبانىڭ ءۇشىنشى باعىتى بويىنشا اۋىل سىرتىندىعى جەرلەردى پايدالانا المايمىز. بۇل ولقىلىقتىڭ ورنىن تولتىرۋ ماقساتىندا ءبىز وسى اۋدانداعى قاراتاۋ اۋىلدىق وكرۋگىنە قاراستى قاراتاۋ جوتاسىنان 500 گەكتار ءتالىمدى جەردى سونداعى شارۋا قوجالىقتارىمەن كەلىسىپ، الدىق. ول جەرگە الداعى كوكتەمدە ارپا ەگۋ جوسپارىمىزدا. ايتا كەتەرلىگى، ول سۋارىلمايتىن جەر. وسىلايشا، اۋىلدى ارزانداتىلعان جەمشوپپەن قامتاماسىز ەتىلمەك. دەگەنمەن 500 گەكتار جەردەن الىناتىن جەمشوپ ارقىلى اۋىلدىق وكرۋگتى تولىقتاي قامتۋ مۇمكىن ەمەس. كەلەر جىلى ءبىر رەت ءونىم الاتىن بولساق، ودان كەيىنگى جوسپارىمىزدا – ەگىن ەگىلەتىن جەردىڭ كولەمىن ۇلعايتۋ. ايتا كەتەرلىگى، اتالعان اۋىلدا سۋارمالى جەر جوق ەمەس، بار. ءبىراق لوتوكتارى قيراپ، ماگيسترالدى كانالدارى ىستەن شىققان. ونى رەتكە كەلتىرگەن كۇننىڭ وزىندە تالاستىڭ جوعارى ساعاسىنان ماردىمدى سۋ كەلە قويمايدى، – دەيدى تالاس اۋداندىق اۋىل شارۋاشىلىعى ءبولىمىنىڭ باسشىسى اۋدانبەك ەرۋباي.