جەتىمىن جىلاتپاعان، جەسىرىن قاڭعىرتپاعان دانا حالقىمىزدا ۇلتىم دەپ تۋعان اتىمتاي جومارتتار جەتەرلىك. وعان دالەل، ەلىمىزدە ورىن العان توتەنشە جاعدايدا قينالعان جاندارعا قول ۇشىن سوزعان الماتى وبلىسى كوكسۋ اۋدانى اقتەكشە اۋىلىنىڭ پەيىلى دارقان جاندارى.
ۇلتىن ۇلىقتاپ، سالتىن ارداقتاعان كىشكەنتاي عانا اۋىلدىڭ ۇلكەن جەتىستىگى – حالقىنىڭ بىرلىگى. ەلىمىزدە توتەنشە جاعداي ورىن العان ساتتە-اق اقتەكشە اۋىلىنداعى تۇرعىندار جۇدىرىقتاي جۇمىلدى. 1970 جىلى اۋىلدا تۋعان جانداردىڭ مۇرىندىق بولۋىمەن قايىرىمدىلىق ەستافەتاسى باستالدى. ياعني، ءار جىلعى اۋىل ازاماتتارى وزدەرىنىڭ كەزەگى كەلگەن كەزدە قارجىلاي اقشا جيناپ، الەۋمەتتىك جاعىنان تومەن وتباسىلار مەن جەتىم-جەسىر، اۋرۋ-سىرقاۋلارعا، توسىننان جاردەمگە ءزارۋ بولىپ قالعاندارعا كومەك قولىن سوزادى. جۋىردا قايىرلى ءىس قىلۋدان 1982 جىلى تۋعان جانداردىڭ كەزەگى كەلدى. «جومارتتىق – جاننىڭ بايلىعى» – دەپ جاقسىلىق جاساۋعا جارىسا ۇمتىلاتىن ولار ەلىمىزدە COVID-19 ىندەتى ءورشىپ تۇرعاندىقتان كوكسۋ اۋداندىق اۋرۋحاناسىنا وتتەگى كونسەنتراتىن الىپ بەرۋدى ءجون سانايدى. ارينە، ىندەت ءورشىپ تۇرعان زاماندا قۇرىلعىنى ساتىپ الۋ وڭاي ەمەس. سوندىقتان ولار «شۇعىلا» قوعامدىق قورى ارقىلى اپپاراتتى قىتايدىڭ گۋانچجوۋ قالاسىنان الدىرتادى. ءسويتىپ، جانى مەيىرىمگە تولى ەرىكتىلەر اۋرۋحاناعا وتتەگى كونسەنتراتىن تارتۋ ەتىپ، باسىن قاتەرگە تىگىپ، كۇنى-تۇنى جۇمىس ىستەپ جۇرگەن دارىگەرلەرگە العىسىن ءبىلدىردى.
شارا بارىسىندا اقتەكشە اۋىلىنىڭ تۋماسى ايناگۇل قۇتتىبەكوۆا:
– جاساندى تىنىس الۋ اپپاراتىن گۋانجوۋ قالاسىنا جەتكىزىپ بەرگەن «شۇعىلا» قوعامدىق قورىنا العىسىمىزدى بىلدىرەمىز. ءبىزدىڭ ماقسات – ءبىر ادامعا بولسا دا كومەكتەسۋ. دانا حالقىمىزدىڭ: «بىرلىك بار جەردە تىرلىك بار»، – دەگەن كەرەمەت ءتامسىلى بۇگىنگى كۇنگە ارنالعانداي. وسى ءبىر سىن ساعاتتا بىرىگىپ، ءبىر جەڭنەن قول، ءبىر جاعادان باس شىعارۋىمىز كەرەك. بارلىق قالتالى جاندار قولىنان كەلگەنشە كومەكتەسسە، بۇل ىندەتتى دە ەڭسەرەمىز. الەمدى جايلاعان ىندەت وڭىرىمىزدە ودان ءارى ورشىمەۋ ءۇشىن مەديسينا قىزمەتكەرلەرى قيىن جاعدايدا جۇمىس ىستەۋدە. ءتىپتى، وزدەرى دە اۋىرىپ جاتىر. ءبىز دە قولدا بارىمىزدى اياماي، كومەكتەسەيىك. قايتارىمسىز قايىرىمدىلىق جاساۋدان قول ۇزبەيىك، – دەدى.
وسىدان كەيىن اتالمىش اۋىل پەرزەنتى بولات كەرىمبەكوۆ: «مەملەكەت باسشىسى قاسىم-جومار توقايەۆتىڭ باستاماسىمەن قولعا الىنعان «ءبىز بىرگەمىز!» اكسياسى شەڭبەرىندە مەسەناتتار، كاسىپكەرلەر مەن بەلسەندى ازاماتتاردىڭ قولداۋىنىڭ ارقاسىندا ەلىمىزدىڭ بارلىق ايماقتارىندا وتباسىعا، ونىڭ ىشىندە جالعىزباستى قارتتارعا، ەرەكشە قاجەتتىلىگى بار جانە ت.ب. ازاماتتارعا كومەك كورسەتىلۋدە. ماسەلەن، اقىن قابان جىراۋ اتىنداعى مەكتەپتىڭ ءار جىلعى تۇلەكتەرى اۋىلىمىزدىڭ الەۋمەتتىك جاعدايى تومەن وتباسىلارىنا، كومەككە مۇقتاج ازاماتتارعا قول ۇشىن سوزدى. ولار ازىق-تۇلىكپەن، مال-مۇلىكتەن، قارجىلاي كومەكتەسۋدە. وسىنداي ساۋاپتى ءىستى قولداۋشى اۋىل ازاماتتارىنا رىزاشىلىعىمدى بىلدىرگىم كەلەدى»، – دەپ ءالى دە قولدان كەلگەن كومەكتەرىن ايانىپ قالمايتىندىعىن ايتىپ، جۇرتشىلىقتى جۇدىرىقتاي جۇمىلىپ يگى ءىس جاساۋعا شاقىردى.
جيىن بارىسىندا اۋداندىق اۋرۋحا ديرەكتورىنىڭ ورىنباسارى زىليحا قاڭلىباي قىزى ەلدىڭ ەرتەڭى ءۇشىن الاڭداپ، قۇرال-جابدىقتاردى اۋرۋحاناعا جەتكىزىپ بەرگەن ەرىكتىلەرگە العىسىن ءبىلدىردى.
– جاناشىر جاندار ناۋقاستارعا ۇلكەن كومەك كورسەتىپ جاتىر. بۇل اپپاراتتار مۇنداعى ناۋقاستارعا ۇلكەن كومەك بولدى. سول ءۇشىن وسىنداي يگى ءىس جاساعان ازاماتتارعا العىسىمىزدى ايتامىز، – دەدى ول.
قايىرىمسىز قايىرىمدىلىق جاساپ، بىرىككەن اۋىل ازاماتتارىنىڭ بۇل ءىسى كوپكە ۇلگى. ۇلتىم دەگەن ۇل-قىزداردىڭ اۋىرعان ناۋقاستارعا دەمەۋ بولعانى، ەلىنىڭ جاناشىرى بولعانى ەرلىكپەن پارا-پار. مەيىرىمدى جاننىڭ بارلىعى قوسىلا ءبىر مەزەتتە جۇمىلىپ كۇرەسسە، بۇل ىندەتتەن دە ارىلاتىنىمىز انىق.
ايدار قالييەۆ
الماتى وبلىسى
پىكىر قالدىرۋ