ءماجىلىس ءتوراعاسى نۇرلان نىعماتۋلين قازاقستانعا رەسمي ساپارمەن كەلگەن تۇركيا ۇلى ۇلتتىق جينالىسىنىڭ ءتوراعاسى مۇستافا شەنتوپپەن كەزدەسىپ، ەكى ەل پارلامەنت وكىلدەرىنىڭ ءوزارا ءىس-قيمىلىن تەرەڭدەتۋ تۋرالى ۋاعدالاستى.

كەزدەسۋ بارىسىندا تاراپتار قوس مەملەكەتتەر اراسىنداعى پارلامەنتارالىق ىنتىماقتاستىقتى ودان ءارى نىعايتۋ ماسەلەلەرىن تالقىلادى.

نۇرلان نىعماتۋلين قازاقستاننىڭ تۇڭعىش پرەزيدەنتى، ەلباسى نۇرسۇلتان نازاربايەۆ ءارقاشاندا تۇركيامەن قارىم-قاتىناستى دامىتۋعا ەرەكشە كوڭىل بولەتىنىنە نازار اۋداردى. بۇگىندە بۇل جولدى مەملەكەت باسشىسى قاسىم-جومارت توقايەۆ جۇيەلى تۇردە جالعاستىرىپ، نۇر-سۇلتان مەن انكارا اراسىنداعى بەرىك بايلانىس نىعايۋ ۇستىندە.

ءماجىلىس ءتوراعاسى تۇركيا سپيكەرىنىڭ قازاقستانعا رەسمي ساپارى پارلامەنتارالىق بايلانىستى نىعايتۋ جولىندا ماڭىزى  وتە زور ەكەنىن اتاپ ءوتتى.

سونداي-اق پالاتا ءتوراعاسى مارتەبەلى مەيمانعا ەلىمىزدەگى زاڭ شىعارۋ قىزمەتىنىڭ جاڭالىقتارى تۋرالى جانە ولاردى زاڭ دەڭگەيىندە قامتاماسىز ەتۋ جايىندا باياندادى.

اتاپ ايتقاندا، تۇرىك كاسىپكەرلەرىنىڭ قارجى، كولىك-لوگيستيكا، اۋىل شارۋاشىلىعى، ءتۋريزمدى دامىتۋ بويىنشا ينۆەستيسيالىق جوبالارعا قاتىسۋ مۇمكىندىكتەرى تۋرالى ءسوز بولدى. نۇرلان نىعماتۋلين اتاپ وتكەندەي، ءماجىلىس دەپۋتاتتارى جۇمىس ىستەپ جاتقان «ونەركاسىپتىك ساياسات تۋرالى» زاڭ جوباسى شەتەلدىك ينۆەستورلارعا، سونىڭ ىشىندە تۇرىك كومپانيالارى ءۇشىن جاڭا مۇمكىندىكتەر اشپاق.

ءوز كەزەگىندە، مۇستافا شەنتوپ:

– تۇركىتىلدەس ەلدەر پارلامەنتتىك اسسامبلەياسىنىڭ ح پلەنارلىق وتىرىسى تۇركىستان قالاسىندا وتەتىنىنە وتە قۋانىشتىمىز. كەلەسى جىلى قازاقستانمەن ديپلوماتيالىق قاتىناس ورناعىنانى 30 جىل تولادى. بۇل دا ءبىز ءۇشىن ەرەكشە ماڭىزدى. ءبىز ءوزىمىزدىڭ شىققان جەرىمىز، تەگىمىز قازاقستان ەكەنىن ۇمىتپايمىز. قازاقستانعا كەلگەن سايىن ءوزىمىزدىڭ اتا-جۇرتىمىزعا كەلگەندەي قۋانىشپەن، ماقتانىشپەن كەلەمىز، – دەدى.

سونىمەن بىرگە، شەنتوپ مىرزا تۇركىتىلدەس ەلدەردىڭ بايلانىسىن نىعايتۋدا ەلباسى نۇرسۇلتان ءابىش ۇلى نازاربايەۆتىڭ ءرولىن اتاپ ءوتىپ، تۇركيا ءۇشىن قازاقستاننىڭ ورنى ەرەكشە ەكەنىن جانە رۋحاني ورتالىعى ەكەنىن جەتكىزدى.

نۇرلان نىعماتۋلين مەن مۇستافا شەنتوپ پارلامەنتارالىق ديالوگ، پالاتا كوميتەتتەرى اراسىنداعى سىندارلى بايلانىس قازاقستان مەن تۇركيا اراسىنداعى ءوزارا ىنتىماقتاستىقتى نىعايتۋعا سەرپىن بەرەتىنىنە نازار اۋداردى.

تۇركيا ۇلى ۇلتتىق جينالىسىنىڭ ءتوراعاسى مۇستافا شەنتوپ قازاقستانعا رەسمي ساپارى اياسىندا 28 قىركۇيەكتە تۇركىستاندا وتەتىن تۇركىتىلدەس ەلدەر پارلامەنتتىك اسسامبلەياسىنىڭ ح پلەنارلىق وتىرىسىنا قاتىسادى.

ءماجىلىستىڭ باسپا ءسوز قىزمەتى