اتىراۋ وبلىسىنىڭ ماحامبەت اۋدانىندا بۋما ءشوپ ورتەنىپ، سونىڭ سالدارىنان 3 بالا قايتىس بولدى. بۇل تۋرالى ق ر تجم رەسمي وكىلى تالعات ءۋالي مالىمدەدى.

– 2021 جىلدىڭ 5 قازانىندا ساعات 19:27-دە كەزەكشى پۋلتىنە ماحامبەت اۋدانى، ورتاقشىل اۋىلى، جاسكەلەنوۆ كوشەسىندەگى ءۇيدىڭ اۋلاسىنا جينالعان 22 دانا بۋما ءشوپ جانىپ جاتقانى تۋرالى حابار كەلىپ ءتۇستى.  وقيعا ورنىنا №11 ءوسب-نىڭ ءورت سوندىرۋشىلەرى 19:45-تە جەتىپ، ءورت 23:07-دە  تولىعىمەن ءسوندىرىلدى، – دەيدى تالعات ءۋالي.

سول ارادا، 6 قازان ساعات 00:02-دە ماحامبەت اۋداندىق پوليسيا بولىمىنە ورتاقشىل اۋىلىندا كامەلەت جاسىنا تولماعان 3 بالانىڭ بەلگىسىز جاعدايدا جوعالعانى تۋرالى حابارلاما كەلىپ تۇسەدى. 

– جوعالعان 2014 جىلعى ەكى بالا مەن 2012 جىلعى ءبىر بالانىڭ دەنەسى ورتەنگەن ءشوپتىڭ اراسىنان تابىلدى. ولاردىڭ دەنەسى پوليسيا دەپارتامەنتى قىزمەتكەرلەرىنە تاپسىرىلىپ، سوت-مەديسينالىق ساراپتاماسى تاعايىندالدى، – دەيدى باسپا ءسوز قىزمەتى.

تجم قازاقستاندىقتارعا ءورت قاۋىپسىزدىگى شارالارىن قاتاڭ ساقتاپ، بالالاردى قاراۋسىز قالدىرماۋ كەرەكتىگىن ەسكەرتەدى.