كلاسسيك جازۋشى، بەلگىلى دراماتۋرگ، قازاقستاننىڭ ەڭبەك ەرى، مەملەكەتتىك سىيلىقتىڭ لاۋرەاتى دۋلات يسابەكوۆتى اقتىق ساپارعا شىعارىپ سالۋ راسىمىنەن سوڭ، مارقۇمنىڭ رۋحىنا ارناپ الماتى قالاسىنداعى قابىلداۋ ۇيىندە جازۋشىلار وداعى باسقارماسىنىڭ ۇيىمداستىرۋىمەن اس بەرىلدى.

الدىمەن قازاقستاننىڭ حالىق ءارتىسى ءاسانالى ءاشىموۆ اق باتاسىن بەردى. مارقۇمنىڭ رۋحىنا ارنالعان استى جازۋشىلار وداعىنىڭ باسقارما ءتوراعاسى مەرەكە قۇلكەنوۆ  اشىپ، جازۋشىنىڭ ءومىرى مەن شىعارماشىلىعى تۋرالى تولعانا ايتىپ بەردى.

«قازاق ادەبيەتىن دۋلات يسابەكوۆسىز ەلەستەتۋ مۇمكىن ەمەس. قولىنان قالامى تۇسكەنشە تەك قازاق ادەبيەتىنە ەڭبەك ءسىڭىردى. ءبىز ءوز ۇلىلارىمىزدى ۇلىقتاعان، قادىرلەگەن حالىقپىز. بۇكىل قازاقستان ءقازىر قارا جامىلىپ وتىر»،  دەدى مەرەكە قۇلكەنوۆ.

اسقا مەملەكەتتىك حاتشى ەرلان قارين مەن الماتى قالاسىنىڭ اكىمى ەربولات دوسايەۆ ارنايى كەلىپ، قاتىستى.

سونىمەن قاتار جازۋشى كادىربەك سەگىزبايەۆ، اقىن ءحانبيبى ەسەنعارايەۆا، جازۋشى، كينودراماتۋرگ سماعۇل ەلۋباي، پارلامەنت ءماجىلىسىنىڭ دەپۋتاتى قازىبەك يسا، قازاقستاننىڭ حالىق ءارتىسى تۇڭعىشباي جامانقۇلوۆ، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەبايەۆتار ءسوز سويلەدى.

ودان بولەك، شىعىس قازاقستان وبلىسى، باتىس قازاقستان وبلىسى، قىزىلوردا، شىمكەنت، تاراز وبلىستارىنان ارنايى دەلەگاسيا كەلىپ، كوڭىل ايتتى. 

ال مادەنيەت جانە اقپارات ءمينيسترى ايدا بالايەۆانىڭ، حالىقارالىق تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆانىڭ، قمدب ءتوراعاسى، باس ءمۇفتي ناۋرىزباي قاجى تاعان ۇلىنىڭ كوڭىل ايتۋ حاتتارى وقىلدى.

P.S. مارقۇمنىڭ دەنەسى الماتى قالاسىندا ورنالاسقان قوعام قايراتكەرلەرى مەن تانىمال تۇلعالارىنا ارنالعان كەڭساي زيراتىنا جەرلەندى.