Whatsapp мессенджерінде Instagram мен Facebook видеоларын көруге мүмкіндік беретін  қосымша функция пайда болды, деп хабарлайды Hi-Tech жаңалықтары.

Енді қолданушыларға өзге қолданушы жіберген видеоны тамашалау үшін чаттан шығудың қажеті болмайды. Видео «сурет ішіндегі сурет» режимінде тікелей қосымшаның өзінде ойнатылады. Қолданушы видеоны көріп отырып, сол мезгілде достарына жібере алады.

Жаңа функция iOS және Android операциялық жүйесіндегі смартфон иелері үшін қолжетімді. Функцияны қолдану үшін қосымшаның соңғы нұсқасын жүктеп алу керек. Бұл жаңарту Facebook-қа тиесілі түрлі сервистер арасындағы байланысты жеңілдетуге арналған.

Осыған ұқсас мүмкіндікті  Whatsapp мессенджері You Tube видеолары үшін былтырғы жылдың қарашасында іске қосқан болатын.

Сонымен қатар мессенджердың соңғы нұсқасында топ әкімшісінің функциялары да кеңейтілген. Енді топты құрған әкімші топ мүшелерінен бекіткен әкімшінің басқару құқығын кері қайтара алады және топтың тақырыбын, суретін, топ сипаттамасын  өзгертетін  мүшелерді өздері таңдай алады. Бұл параметрлерді "топ  баптаулары" бөлімінен табуға болады.