1 маусымнан бастап қысқы дөңгелекпен жүруге тыйым салынады

2025 жылдың 1 маусымынан бастап автокөлік жүргізушілеріне қысқы, соның ішінде тікенекті дөңгелектермен жүруге заң жүзінде тыйым салынады. Бұл талап Әкімшілік құқықбұзушылық туралы кодекстің 590-бабы, 5-тармағына сәйкес жүзеге асырылады. Онда техникалық регламенттер мен ұлттық стандарттарға сәйкес келмейтін көлік құралдарын басқаруға тыйым салынатыны көрсетілген.

Қысқы дөңгелекпен жүргені үшін айыппұл қарастырылған:

• Алғашқы құқықбұзушылық үшін — 5 айлық есептік көрсеткіш (АЕК) көлемінде, яғни 19 145 теңге айыппұл салынады;

• Қайталанған жағдайда — айыппұл мөлшері 20 АЕК-ке дейін өсіп, 76 580 теңгеге жетеді.

Неге тыйым салынған?

Жаз мезгілінде қысқы және тікенекті дөңгелектерді пайдалану:

• Жол жабындысын зақымдайды;

• Ыстық ауа райында жол бетіне артық қысым түсіреді;

• Автокөліктің басқару мүмкіндігін нашарлатады;

• Жанармай шығынын арттырады;

• Дөңгелек тез тозады.

Қысқы дөңгелекті қашан ауыстыру керек?

Қолданыстағы талаптарға сәйкес, тікенекті қысқы дөңгелектерді пайдалану мерзімі — 1 желтоқсаннан 1 наурызға дейін. Бірақ нақты мерзім өңірлердегі ауа райының жағдайына байланысты өзгеруі мүмкін.

Жазғы дөңгелекке ауысу үшін сыртқы ауа температурасы орта есеппен +5 °C және одан жоғары деңгейде тұрақты болуы тиіс. Себебі қысқы дөңгелек жылы ауа райында жұмсарып, өз қасиетін жоғалтады.