Aqpan aıynyń basynda jol aqysyn tóleýden bas tartqan eki jolaýshy soqqyǵa jyǵyp, bir kózinen aıryldy delingen avtobýs júrgizýshisi polısıaǵa jalǵan málimet bergen, - dep habarlaıdy «Qamshy» portaly Almaty qalasy İİD baspasóz qyzmetine silteme jasap.

«Atalǵan is boıynsha QK 293-babymen tergeý bastalǵanyn habarlaǵanbyz. Tergeý barysynda jábirlenýshi belgisiz eki er kisi uryp ketti degen bolatyn. Soqqyǵa jyǵý sebebin júrgizýshi belgilengen tártippen jol aqysyn tóleýden bas tartý dep túsindirgen edi.

Atalǵan qylmysty tergeý boıynsha qurylǵan top jábirlenýshiniń jalǵan málimet bergenin jáne tergeýdi basynan bastap basqa baǵytqa buryp jibergenin anyqtady. Shyn máninde jábirlenýshini óziniń týǵan jıeni soqqyǵa jyqqan», - delingen baspasóz qyzmeti taratqan habarlamada.

Tergeý barysynda júrgizýshini 33 jastaǵy týysy materıaldyq kelispeýshilik saldarynan soqqyǵa jyqqany anyqtalǵan. Kúdikti naǵashysynyń oǵan iri kólemde aqsha qaryz bolǵanyn aıtqan.

Sondaı-aq, İİD baspasóz qyzmeti máseleniń mán-jaıy anyqtalǵan soń  jábirlenýshiniń ózine qol jumsaǵan týysyn jaýapkershilikke tartpaý týraly ótinish bergenin habarlaıdy.

«Jaqyn kúnderi osy oqıǵa boıynsha prosesýaldyq sheshim qabyldanyp, aryzdanýshynyń áreketterine quqyqtyq baǵa beriletin bolady», - deıdi Medeý aýdandyq İİB bastyǵy polısıa polkovnıgi Erlan Oralbekov.

Buǵan deıin biz atalǵan júrgizýshiniń densaýlyǵyna keltirilgen zıan úshin «Ońaı» elektrondy bılettendirý júıesin engizgen kompanıadan 5 mıllıon teńge ótemaqy talap etkenin jazǵan bolatynbyz.