Búgin keshki saǵat on jarymda «Habar» arnasynan kórsetiletin Májilis saılaýyna qatysýshy partá ókilderi arasyndaǵy teledebattyń túsirilimi ótti. Oǵan aldynda habarlanǵandaı alty partıanyń ókili qatysyp, óz ustanymdaryn jetkizdi.

Úsh kezeńnen turǵan pikirsaıystyń alǵashqy kezeńi «Álemdik jańa ekonomıkalyq ahýal: máseleler men damý» taqyrybyna, ekinshi kezeń: «Qazirgi jaǵdaıdaǵy ınfraqurylym, kólik, logıstıka» taqyrybyna arnaldy. Saıası naýqan kezinde ekonomıkanyń kólik, tasymal, ınfraqurylym syndy tar taqyryptaryn negizgi áńgimege arqaý etý – áý bastan saıasatkerlerdiń batyl málimdemelerine jol bermeý maqsatynan týǵan sekildi. Tek úshinshi kezeńde ǵana spıkerlerge saılaýshylarǵa úndeý arnaýǵa múmkindik berilipti.

Spıkerler saılaý búlleteninde belgilengen tártip reti boıynsha sóz alyp, pikirsaıystyń úshinshi týrynda saılaý men eldiń saıası ómirine, keleshegine qatysty oılaryn ortaǵa salyp, saılaýshylarǵa úndeý jasady. Onda «Nur Otan» partıasy tóraǵasynyń birinshi orynbasary Asqar Myrzahmetov eldiń búgingi jetken jetistikteriniń barlyǵyn Elbasy júrgizip otyrǵan saıasattyń jemisi depti.

«Táýelsiz Qazaqstan qol jetkizgen barlyq jetistikter Elbasy bastaǵan barlyq otandastarymyzdy eńbeginiń jemisi. Táýelsizdik jyldary biz birneshe daǵdarysty bastan keshirdik: ekonomıkany damyttyq, myńdaǵan aýrýhana, mektep, joldar saldyq, ónerkásip pen shaǵyn bıznestiń jańa salasyn qalyptastyrdyq... Jańa qaterlerge naqty jospar bar, ol – «Nurly jol» baǵdarlamasy», - dedi A. Myrzahmetov.

«Aq jol» atynan sóılegen partıa jetekshisi Azat Perýashev:

«Aq jol» fraksıasy pardamentte úkimettiń kóptegen bastamalaryna qoldaý tanytpaı, qalys qalyp keldi. Buǵan biz osylaı isteýdi qalaǵannan emes, memlekettik organdardyń jumysyn tıimdi, jarıa etý, olardyń jaýapkershiligin arttyrý maqsatynda bardyq», - dedi.

A. Perýashev halyqty saılaýǵa belsendi qatysyp, óz daýystaryn qalaǵan saıası partıaǵa berýge, sol arqyly halyq úshin áldebireýlerdiń sheshim shyǵarýyna jol bermeýge shaqyrdy.

«Aýyl» partıasynyń jetekshisi Álı Bektaev:

«Aldaǵy saılaý – barlyǵymyz úshin, elimiz úshin úlken saıası jáne tarıhı oqıǵa. Biz barlyǵyńyzdy saılaýǵa qatysýǵa, ózderińizdiń saılaý quqyqtaryńyzdy paıdalanýǵa shaqyramyz. «Aýyl» partıasy sizderdi tek partıa úshin ǵana emes, elimizdiń áli kúnge asyraýshysy bolyp otyrǵan aýyl úshin, aýyl sharýashylyǵy úshin daýys berýge shaqyramyz», - degen úndeý jasady.

Komýnıster atynan Vladıslav Kosarev sóz alyp, partıanyń saılaýǵa barýdaǵy maqsat, mindetterin jetkizipti.

«Biz parlamentke sizderdiń ómirlik josparlaryńyz, armandaryńyz ben óz ómirlerińizdegi baqytta sátter úshin kúresýge baramyz. Biz, komýnıster, Úkimetke batystyń magnattary sıaqty oılaryna kelgendi isteýge jol bermeımiz», - deıdi ol. Úndeýiniń aıaq jaǵyn V. Kosarev óleńge aınaldyryp jiberipti.

Qazirgi bılikke ashyq qarsylyq tanytyp júrgen jalǵyz saıası partıa- Jalpyulttyq sosıal-demokratıalyq partıa atynan pikirsaıysqa qatysqan Záýresh Battalovnań sózderi jańarýǵa shaqyrǵan batyl málimdeme bolǵan sıaqty.

«22 naýryzda biz Naýryzdy – jańarý merekesin, jańa jyl men jańa ómirdiń bastaýyn atap ótemiz. Kún men tún teńeletin kóktemniń osy kúninde aspan deneleri men juldyzdar ózderiniń bastapqy núktelerine kelip, jańa jol, jańa sıkl bastaıdy. 20 naýryzda saılaý ótedi. Osy kúni qazaqstandyqtar óz tańdaýlaryn jasap, jańa jol, jańa sıkl bastaıdy. Joq degende bizdiń memleketimizdiń jańasha damýyna talpynady», - degen ol eldi jańarý merekesi qarsańynda óz partıalaryna daýys berýge shaqyrypty.

«Birlik» partıasy atynan sóz jarysqa shyqqan úmitker Roza Qýanyshbaeva saıası uıymnyń ekologıa men qorshaǵan ortany qorǵaý máselesine kóńil bóletinin jetkizgen.

«Ózimizdiń azamattyq jaýapkershiligimizdi sezine otyryp, biz bolashaq urpaqqa taza Qazaqstandy qaldyrýdy maqsat etemiz. Álem úlken klımattyq ózgerister aldynda tur. Qazir barlyq qazaqstandyqtardyń qorshaǵan ortany qorǵaý máselesindegi belsendi azamattyq ustanymy óte mańyzdy», - degen ol bolashaqta jasyl ekonomıkaǵa kóshý máselelerine kóńil aýdartty.

Ár saıası partıa óz jetekshileri men ókilderiniń teledebatta aıtqan sózderin ózderine tıesili aqparat resýrstary arqyly taratýda. Tańerteń túsirilgen telebaǵdarlamanyń kógildir ekrannan kórermen nazaryna usynylǵanǵa deıin qanshalyqty ózgeriske ushyraıtyny, osy saıası shara úshin berilgen 90 mınýt ýaqyttan kimge qanshasy tıesili bolatyny keshke belgili bolady. Qalaı bolǵanda da saıası tartys quraly retinde mańyzy joǵary, saılaý nátıjeleri men saılaýshylardyń tańdaýyna yqpal etýdiń basty quraly sanalatyn teledebattyń úgit-nasıhat naýqyny aıaqtalýǵa jaqyndaǵanda ótkizilýiniń ózi bıliktiń ashyq pikir talas pen ádil básekege áli de úrke qaraıtynyn ańǵartyp otyr. Soǵan qaraǵanda erkin oıly azamattardyń Májiliske ótip, parlamentti jańarta qoıýy da ekitalaı sıaqty.

Darhan Muqantegi