Búgin keshke «Habar» arnasynan kórsetilýi tıis teledebatqa qatysqan saıasatkerler túsirilimnen soń piriksaıys týraly oılaryn aıtty, - dep habarlaıdy «Qamshy» portaly Total.kz – ke silteme jasap.

«Aq jol» partıasynyń jetekshisi atalǵan sharany «urandar saıysy» dep baǵalap, kóńili tolmaıtynyn aıtqan.

«Mundaı pikirsaıystyń ótkeni durys, árıne. Biraq, men úshin eki mınýt ishinde konseptýaldy dúnıelerdi aıtyp shyǵý ońaıǵa soqpady. Ókinishke oraı, munda konseptýaldy oılar saıysy emes, jalpylama sózder aıtylǵan urandar saıysy boldy. Bir jaǵynan bul saılaý bolǵan soń, adamdar urandarǵa mán beredi dep oılaǵan bolý kerek», - degen A. Perýashev mundaı sharalar «Betpe-bet» formatynda kún saıyn ótkizilýi kerektigin aıtady.

Komýnıster ókili V. Kosarev bolsa, pikirsaıysqa «qalypty» degen baǵa bergen. «Aýyl» partıasynyń jetekshisi Álı Bektaev ta uıymdastyrylǵan pikirsaıysqa kóńili tolatynyn aıtqan.

Al, «Birlik» partıasynyń atynan sóz talastyrǵan Roza Qýanyshbaevany janyndaǵylar pikirsaıystan soń «Jýrnalıserge suhbat berý máselesi partıa basshylyǵymen kelisilmegen» dep alyp ketken.

JSDP ókili Záýresh Battalova bolsa, bul baǵdarlamanyń pikirsaıys formatyna kelmeıtinin aıtqan.

«Bul debat emes, tanystýry sózine kóp keledi. Debat degen júıeli, turaqty bolyp, qoǵamnyń ár salasyna qatysty máselelerdi kóterýi kerek. Oǵan tek partıa jetekshileri nemese ókilderi ǵana emes, barlyq nıet bildirýshiler qatysa alýy kerek qoı. Oǵan spıkerler aldyna mańyzdy máseleler usynatyn, suraqtar qoıa alatyn kóptegen azamattar qatysýy tıis emes pe?», - deıdi Z. Battalova.

Búgin tańerteń ótken teledebat túsirilimine jýrnalıser qatyspaǵan. Saıasatkerlerdiń sózderin BAQ ókilderi OKQ zalynda ekrannan tamashalaǵan. Jýrnalıser reglament boıynsha 90 mınýt ótedi delingen pikirsaıystyń bar-joǵy 70 mınýtqa sozylǵanyn aıtýda.