Qazaqstan bıligindegi konstıtýsıa boıynsha ekinshi adam, Parlament Senatynyń tóraǵasy Qasym-Jomart Toqaev «Rossııskaıa gazetaǵa» bergen suhbatynda elimizde parlamenttiń ókilettiligi keńeıýi múmkin ekenin aıtqan, - dep habarlaıdy «Qamshy» portaly.

Reseılik basylym Qasym-Jomart Kemelulynyń eldegi kezekten tys ótkeli otyrǵan parlamenttik saılaý, saıası júıeniń damýy men Eýrazıalyq ekonomıkalyq odaqqa qatysty qoǵamnyń kóńil kúıi týraly pikirlerin bilgen.

Suhbatynda Qasym-Jomart Toqaev  Qazaqstannyń bolashaqta parlamenttik-prezıdenttik basqarý júıesine kóshetinin aıtqan.

«Parlamenttiń rólin kúsheıtý prosesi keshe bastalǵan is emes. Búginde parlament zań shyǵarýshy qyzmetten basqa, eldegi kadrlyq saıasatqa tikeleı aralasady. Prezıdent premer-mınıstrdi, Ulttyq bank tóraǵasyn, bas prokýror men ulttyq qaýipsizdik komıtetiniń tóraǵasyn parlamenttiń kelisim berýimen taǵaıyndaıdy, Joǵarǵy sot tóraǵasy men sýdıalary, basqa da laýazymdy tulǵalar depýtattardyń kelisimimen saılanyp, qyzmetterinen bosatylady», - degen Q. Toqaev búginniń ózinde depýtattyq korpýstyń eldiń saıası ómirine belsendi aralasatynyn aıtqan.

«Meniń oıymsha Qazaqstanda parlamenttiń róli arta beredi. Mundaı senimdilikke prezıdent Nursultan Nazarbaevtyń strategıasy da sebep bolyp otyr. Biz Qazaqstanda saıası reformalar eseppen, orta taptyń qalyptasýy men azamattyq qoǵamnyń damý deńgeıine qaraı júrgizilip keledi dep sanaımyz. Biz memlekettiń evalúsıalyq damýyn jaqtaımyz. Sondyqtan, Qazaqstan bolashaqta kúshti parlamentpen birge transparentti jáne esepti úkimet áreket etetin parlamenttik-prezıdenttik basqarý júıesine kóshetinin joqqa shyǵarmaımyn. Biraq, bul meniń jeke boljamym. Aqyrǵy sózdi prezıdent pen qoǵam aıtady», - degen Q. Toqaev.

Sondaı-aq, Q. Toqaev myrzaǵa «Qazaqstanda eldiń eýrazıalyq ıntegrasıalyq prosesterge jáne halyqaralyq ınstıtýttarǵa qatysýyna qatysty balama kózqarastarǵa ıe saıası kúshter bar ma?» degen de suraq qoıylǵan.

«Aımaqtyq kooperasıalarǵa balama – ózin-ózi oqshaýlaý. Mundaı perspektıva halyqtyń keń kólemdi qoldaýyna ıe bola qoıýy ekitalaı. Ekinshi másele – ıntegrasıa sapasy. Mysaly, Eýrazıalyq ekonomıkalyq komısıa jumysyn Qazaqstannan basqa da uıym músheleri synap jatyr. Bul birlestikten halyqaralyq ekonomıkalyq uıym retinde kútiletin dúnıe kóp. Sondyqtan, der kezinde EAEO-ǵa múshe barlyq elderdiń múddesin qamtıtyn is-qımyldar algorıtmin jasaý kerek. Memleket basshylary keń ókilettilik berip otyrǵan Eýrazıalyq ekonomıkalyq komısıa jumysynyń mańyzy da osy.

Sonymen qatar, aldyǵa erterek ozyp ketip, EAEO jumysyn qıyndatatyn bastamalarmen de asyǵystyq jasamaý kerek. Integrasıa azamattardyń ál-aýqatyn arttyrýǵa, elderdi álemdik ekonomıkanyń jetekshi oryndaryna shyǵarýǵa qyzmet etýi tıis», - degen jaýabymen Q. Toqaev el ishinde Reseı bastaǵan ekonomıkalyq odaqqa eshqandaı narazylyq joq dep bir-aq kesipti.