IýNESKO-nyń «Adam jáne bıosfera» baǵdarlamasynyń halyqaralyq úılestirý keńesi (HÚK) bıosferalyq qoryqtardyń dúnıejúzilik jelisin 20 jańa qoryqpen tolyqtyrdy. Olardyń arasynda Aral teńizi baseıninde ornalasqan «Barsakelmes» qoryǵy bar, - dep habarlaıdy «Qamshy» portaly QazAqparatqa silteme jasap.

IýNESKO-nyń saıtynan habarlaǵandaı, 1970-shy jyldardyń basynda qurylǵan «Adam jáne bıosfera» baǵdarlamasy adam men tabıǵattyń ózara yqpaldastyǵyn jahandyq ońtaılandyrýǵa baǵyttalǵan ǵylymı úkimetaralyq joba bolyp tabylady.

«Bıosferalyq qoryqtardyń dúnıejúzilik jelisi jyl saıyn quramyna IýNESKO-ǵa múshe 34 memlekettiń ókili bar baǵdarlamanyń Halyqaralyq úılestirý keńesiniń sheshimi boıynsha tolyqtyrylady», - delingen habarlamada.

Uıymnyń atap ótýinshe, Barsakelmes bıosferalyq qoryǵy (Qazaqstan) Saharadan Gobıge deıin jalǵasatyn shóleıtti beldeýdiń qaq ortasynda, Aral teńiziniń baseıninde ornalasqan.

«Aral teńiziniń aımaǵy shóldi batpaq júıeleri men jyl qustarynyń mıgrasıalyq baǵyttaryn saqtap qalý úshin mańyzdy aımaq bolyp tabylady. Qoryq Aral teńiziniń bıoalýantúrliligin saqtaý isinde basty ról atqarady. Atap ótkende, munda 2 myńǵa jýyq omyrtqasyzdar, sútqorektilerdiń 30 túri, qustardyń 178 túri jáne reptılıalardyń 20 túri bar. Qoryqtyń aýmaǵynda sondaı-aq qazaq kóshpendileriniń kóne Jibek jolynda ornalasqan tórt ortaǵasyrlyq ortalyǵy ornalasqan», - delingen habarlamada.