Túrkistan qalasynyń "Dostyq" úıinde "Ádiletti Konstıtýsıa – qýatty memleket" taqyrybynda dóńgelek ústel ótti. İs-sharanyń maqsaty – konstıtýsıalyq reformalardyń mańyzdylyǵyn talqylaý, qoǵamdaǵy quqyqtyq mádenıetti arttyrý jáne ádil qoǵam qurý máseleleri boıynsha pikir almasý.
Keńeske memlekettik organdardyń ókilderi, qoǵam qaıratkerleri, ǵalymdar men zıaly qaýym ókilderi qatysty. Dóńgelek ústeldi Túrkistan oblystyq máslıhatynyń tóraǵasy, Konstıtýsıalyq reforma jónindegi komısıanyń múshesi Nuraly Ábishov júrgizdi.
Túrkistan oblysynyń ákimi Nuralhan Kósherov óńirdiń áleýmettik-ekonomıkalyq damýy men memlekettik saıasatty iske asyrýda zań ústemdiginiń mańyzdylyǵyn atap ótti.
«Prezıdent Qasym-Jomart Kemeluly Toqaevtyń Jarlyǵyna sáıkes 15 naýryzda jańa Konstıtýsıaǵa arnalǵan respýblıkalyq referendým ótetini belgili. Bul egemen eldiń bolashaǵyna jasalǵan mańyzdy qadam. Konstıtýsıalyq reforma eldi saıası jańǵyrtýǵa, azamattardyń quqyqtary men bostandyqtaryn nyǵaıtýǵa, qoǵam men memleket arasyndaǵy ózara senimdi nyǵaıtýǵa baǵyttalǵan. Bul "halyq únine qulaq asatyn memleket" tujyrymdamasynyń jarqyn kórinisi. Jańa konstıtýsıalyq modeldiń arqasynda biz ádil Qazaqstannyń irgetasyn qalap otyrmyz», - dedi Kósherov.
Onyń aıtýynsha, jańa zańda adamnyń qundylyǵy artyp,"adam memleket úshin emes, memleket adam úshin" qaǵıdasy aldyńǵy qatarǵa shyǵady.
«Áleýmettik jaýapkershilik kúsheıip, memlekettiń halyq aldyndaǵy mindetteri keńeıtilip, teńsizdikti azaıtý tetikteri bekitilýde. Bilim, ǵylym jáne ınovasıa elimizdiń basty ıdeologıasy retinde anyqtalady. Tártip pen ádilettilik, ıaǵnı zańnyń ústemdigi jáne tabıǵatqa uqypty qaraý alǵash ret konstıtýsıalyq deńgeıde bekitiletin bolady. Ádil Konstıtýsıa-bizdiń qýatty memleketimizdiń berik ózegi. Sondyqtan barlyǵyn 15 naýryzdaǵy referendýmǵa belsendi qatysýǵa shaqyramyn. Bul elimizdiń taǵdyryn aıqyndaıtyn, árbir azamatqa bolashaqqa tikeleı úles qosýǵa múmkindik beretin tarıhı múmkindik», – dep atap ótti Kósherov.
Keńes barysynda Túrkistan oblysy Qazaqstan halqy Assambleıasy janyndaǵy Analar keńesiniń tóraǵasy Gúlsara Toqqulova sóz sóılep, qoǵamdaǵy birlik pen otbasy qundylyqtarynyń mańyzdylyǵyna nazar aýdardy. Túrkistan oblysy Ádilet departamenti basshysynyń orynbasary Nurlan Ermekeshov quqyqtyq júıeni jetildirýdegi konstıtýsıalyq reformalardyń róli týraly aıtyp berdi.
Aqyn-aıtysker Bekarys Shoıbekov jáne basqa da zıaly qaýym ókilderi eldiń damýy úshin ulttyq sananyń rýhanı qundylyqtary men mańyzy týraly óz oılarymen bólisti.
Dóńgelek ústel sońynda qatysýshylar qoǵamdy jańǵyrtýdaǵy konstıtýsıalyq reformalardyń mańyzdylyǵyn atap ótip, quqyqtyq memleket qurý bastamasyna qoldaý bildirdi.
