Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty, - dep habarlaıdy Aqorda. 

Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.

Túrkistan oblysy TJD málimetinshe, 18 qarashada tańerteń Jetisaı aýdanyndaǵy Alǵabas aýylynda eki qabatty jeke turǵyn úıde órt shyqqany týraly habar túsken.

Órt sóndirý bólimshesi jetken kezde úı tolyqtaı órtke oranǵan.

"Barlaý jáne órtti sóndirý kezinde úıden es-tússiz kúıde jatqan úsh adam evakýasıalanyp, jedel medısınalyq járdem brıgadasyna tapsyryldy. İshten toǵyz balany qosa alǵanda, 12 adam óli tabyldy", – delingen habarlamada.

Kórshilerdiń aıtýynsha, órt shyqqan kezde úıde qonaqtar bolǵan, sebebi aldyńǵy kúni úı ıeleri otbasylyq shara uıymdastyrǵan.

360 sharshy metr aýmaqtaǵy órt tolyq sóndirildi. Oqıǵa ornynda barlyq jedel qyzmet jumys istep jatyr. Tergeý bastaldy, órttiń shyǵý sebebi anyqtalyp jatyr.