13 naýryz kúni Almaty qalasynda respýblıkalyq referendým ótkizý kezeńindegi jumysty uıymdastyrýǵa arnalǵan táýelsiz baıqaýshylardyń Aqparattyq shtabynyń ekinshi brıfıńi ótti.
Brıfıń barysynda shtab jumysynyń belsendi kezeńge ótkeni jarıalandy. Aqparattyq alań 14 naýryzdan bastap jumys isteıdi jáne referendým ótetin kún boıy, sondaı-aq daýys berý qorytyndylary tolyq shyǵarylǵanǵa deıin qyzmetin jalǵastyrady.
Shtabtyń negizgi mindeti – daýys berý barysy týraly azamattar men buqaralyq aqparat quraldaryn jedel aqparatpen qamtamasyz etý, sondaı-aq bolyp jatqan úderister jóninde obektıvti aqparattyq kórinis qalyptastyrý. Sonymen qatar kelip túsetin aqparatty tekserýge jáne jalǵan habarlamalar men feık aqparattardyń taralýyna jol bermeýge erekshe nazar aýdarylady.
Shtab jumysynyń translásıalary men aqparattyq qosylymdar Independ.kz YouTube arnasynda kórsetiledi. Shtab jumysyna qatysty anonstar, jańalyqtar jáne jedel aqparat Almaty qalasynyń Qoǵamdyq komýnıkasıalar ortalyǵynyń áleýmettik jelilerdegi resmı paraqshalarynda jarıalanyp otyrady.
Brıfıń barysynda táýelsiz baıqaýshylar koalısıasynyń quramy týraly da aqparat berildi. Koalısıa quramyna Almaty qalasynda 2,5 myńnan astam táýelsiz baıqaýshyny biriktiretin 6 úkimettik emes uıym kirdi.
Koalısıa ókilderi elimizdiń basqa óńirlerinde de jumys isteıdi. Referendým kúni Astana, Almaty jáne Shymkent qalalarynan, sondaı-aq Qazaqstannyń onnan astam óńirinen tikeleı qosylymdar josparlanǵan. Bul elimizdegi jaǵdaı boıynsha jedel ári tutas aqparattyq kórinis qalyptastyrýǵa múmkindik beredi.
Brıfıńke qatysýshylar referendým kezeńinde aqparatqa jaýapkershilikpen qaraýdyń mańyzdylyǵyn atap ótip, azamattardy zań men tártipti saqtaýǵa, arandatýshylyqtarǵa ermeýge jáne aqparatty tek senimdi derekkózderden alýǵa shaqyrdy.
Sondaı-aq azamattardyń daýys berýge qatysýy demokratıalyq úderisterdiń mańyzdy bóligi ekeni jáne árbir qazaqstandyq óz azamattyq ustanymyn bildirýge múmkindik alatyny atap ótildi.
