Oralman degen kim?- deseń,

Shoshqanyń etin jemek túgili,

Beınesine de qaramaǵan,

San tarıh samaıyn jaralaǵan.

Esin jıyp eline oralǵanda,

"Qashqynsyń",-dep baýyry qaralaǵan.

Qaltasynda kók tıyn bolmasa da,

Adamnan nan suraýdy qalamaǵan.

Til men dini qalpynda joıylmaǵan,

Páktigine esh shekit qoıylmaǵan.

Qazaqstan qazaǵy moıyndamaı,

Búkil alem {momyn} muhmyn dep moıyndaǵan.

Balasy 4 jasynda atqa mingen,

Patshadan da baısaldy taqqa mingen.

Atasynyń qylyshyn dat bastyrmaı,

Torǵynǵa orap tórine saqtap ilgen.

Qyzdarynyń baltyry ashylmaǵan,

Jaratqannan basqaǵa bas urmaǵan.

Sálem bergen adamdy týys kórip,

Kóńiline qupıa jasyrmaǵan.

Nárestesi kózdi ashyp besik kórgen,

Jerdiń júzin aralap kóship kórgen,

Qazaqstan shańyraq kótergende,

"Bir ýyǵy bolam!", - dep kóship kelgen.

Jónsiz joldy jaqyn dep basqan emes,

Kindigi men tizesin ashqan emes.

Ketkeni ras din, tilin saqtaý úshin,

Beker bosqa, tentirep qashqan emes.

Týǵan jer topyraǵyn shytqa túıip,

Saǵynǵanda sony ıiskep jylap júrgen.

Urpaq úshin erteńgi josyp júrgen,

Balasy da jaýynger esin bilgen.

Jantaıatyn jattyq jer tappaǵanmen,

At jalynda namazyn oqyp júrgen.

"Qashqynsyńdar!"-deıtuǵyn ókpeshil kóp,

El bolǵan soń uıalmaı jetkesiń dep.

Erý eldiń súzegen taıynshalary,

İrese de úndemeı ókpesin kóp.

Mine osylar siz aıtqan oralmandar,

Shetelde emes úıge kep tonalǵandar.

Myń jyǵylyp, myń turyp muqalmaıtyn,

Sabyrlyqpen bárine tóze alǵandar.

"Oralman",-dep baýyrym jamandama,

Teńge, dollar tapsyr dep jalańdama.

Damytpasa oralman kemitpeıdi,

Alańdama, olardan, alańdama!

Laıy joq, tap-taza tili tunyq,

Eı, baýyrym! Qaraısyń nege sýyq?!

Orys, Karıs, nemistiń balasy emes,

Úrikpe, óz týysyń saǵan jýyq.

Qasymyz joq, qarsy alar dosymyz dep,

Kelgenderge qushaqty ashyńyz kóp.

Altyn izdep kelmegen, asyl izdep,

Atasynyń kelgender basyn izdep.

Oılamańdar boldy dep aýyr salmaq,

Ár pendeni turady táńir qoldap.

Yryzdyqty beriýshi tek bir Alla,

Dámetpeıdi sizderden jarty jarmaq.

Bilim izdep kelgender, ǵylym izdep,

Kolbasa men kelmegen shylym izdep.

İzdep kelgen aǵamyz, inimiz dep,

Týystyqtyń qadirin bilińiz dep.

Boqshylyq dúnıeni bir-aq tastap,

"Elin",-izdep kelgender "Elin",-izdep!

Muhtar Noǵaıbekuly