Qazaq – taǵdyr tálkegin kóp kórgen halyq. Qoldan jasalǵan sandaǵan zulmattar men túrli qýǵyn-súrgin saldarynan qazaqtaı shashylǵan el joq shyǵar. Elbasy N. Nazarbaev aıtqandaı, osy kúnge deıingi qazaqtyń tarıhy birigý tarıhy bolyp keledi. Osy birlik pen ulttyq biraýyzdylyqty maqsat etken qor quryldy jaqynda.

«Bir elde ómir súrip, bir qazaq bola tursa da júz ben rýǵa, din men tilge, jerge bólinetin qazaǵymyzdyń qazirgi kúıi kóńil qýantarlyqtaı emes. Zaman ózgerdi m, adam ózgerdi me dep otyra bersek, otyra beremiz. Eldi birlikke shaqyratyn, atadan dástúr bolyp qalǵan meıirbandyq pen qaıyrymdylyq qasıetterimizdi qalpyna keltirýge naqty áreket kerek», - deıdi «Álem qazaqtarynyń birlik qory» atty qoǵamdyq birlestikti qurǵan azamattar.

Osy jerde uıymdastyrýshylar bul uıymnyń qandaı da bir saıası múddelerden, saıası maqsattardy kózdeıtin toptardan ada ekenin erekshe atap otyr.

«Qordy qurýdaǵy negizgi maqsatymyz: dúnıejúzindegi qazaqtardyń basyn qosý, qaıyrymdylyq jolynda jumys jasap, materıaldyq jaǵdaıy nashar, kóp balaly jáne tolyqqandy emes otbasylarǵa kómek kórsetý, elimiz ben jerimizdiń, ultymyzdyń bolashaǵy úshin eńbek etip, bir kisideı kómek qolyn sozý,óz úlesimizdi qosý.», - deıdi uıymdastyrýshylar.

Qordyń basshysy Táńirbergen Baımurzaev degen aqsaqal. 1935 jyly Túrkistan ólkesinde dúnıege kelgen atamyz qyzmet jolyn Shymkent qalasynda bastaǵan eken. Uzaq jyl qurylysshy- ınjener bolyp eńbek etken  atamyz búginde - musylmannyń bes paryzynyń birin oryndaǵan qajy. Táńirbergen qajynyń artynan ergen baýylarynyń biri, qordy uıymdastyrýshy ári oń qoly Raıys Áripjanuly.

«Evreıler kezinde 600 jyl memleketsiz júrgende osyndaı qorlary jumys istep turǵan. Biz de álemdik tájirıbelerdi zertteı kele osyndaı qor qurý kerek degen oıǵa keldik. Qordyń maqsaty – quryltaıshylaryn baıytý emes, kedeı-kepshikke kómektesý, ultqa qyzmet etý», - deıdi Táńirbergen qajy Baımurzaev.

Qor quryltaıshylary uıymnyń qaıyrymdylyqtan basqa rýhanı, mádenı baǵyttaǵy jumystarǵa da demeýshilik jasaıtynyn aıtady.

Erlan Tóleýbaı