Búgin, ıaǵnı 2016 jyldyń 22 sáýirinde ál-Farabı atyndaǵy Qazaq ulttyq ýnıversıtetinde,  «Bıznes pen yntymaqtastyqtyń jańa nysandary – Shyǵys pen Batys arasyndaǵy ózara árekettestik»  atty İİİ Azıa-Eýropa Bıznes Inovasıalar Kongresiniń aıasynda jyl saıynǵy «Path to Succes» KazNU Job/Intership Fair - «Tabysqa aparar jol» - bos qyzmet oryndarynyń jáne tájirıbe ótetin oryndardyń  jármeńkesi ótti, - dep habarlaıdy Qamshy.kz.

Ál-Farabı atyndaǵy QazUÝ-dyń  zertteý ýnıversıtetine aýysý úshin, zamanaýı tehnologıalardyń kómegimen oqytýdyń ınovasıalyq ádisterin paıdalaný kerek. Ol óz kezeginde ýnıversıtet pen jumys berýshilerdiń yntymaqtastyǵyn damytýda asa mańyzdy ról atqarady.

QazUÝ túlekterine jumys berýshi seriktesterdiń qataryna Qazaqstannyń jáne shet elderdiń kóshbasshy kompanıalary men uıymdary kiredi. Atalmysh kompanıalar  jyl saıyn ál-Farabı atyndaǵy QazUÝ-dyń 2000-nan astam túlekterin jumyspen qamtamasyz etse, 3000-nan asa stýdentterine tájirıbeden ótýge múmkindik berip otyr.

Búgingi jármeńkege «Air Astana», «Qazaqtelekom», «Kazkom», «Halyk Bank»,  «Tele-2» jáne t.b. irili-usaqty 170 kompanıa qatysyp, túlekterge jumys usyndy. Jumys berýshilermen ótkiziletin jármeńke aıasynda jumys izdeýshilerge arnaıy sheberlik-synyptary, trenıńter men semınarlar ótkizilip jatyr.

Ótkizilgen jármeńkeniń jaıly tolyǵyraq maǵlumat jınaqtaý maqsatymen sharanyń basy-qasynda júrgen mamandardyń pikirin tyńdap kórdik.

Baqytjan Saparov, «Mansap jáne bıznes» ortalyǵynyń dırektory:

 - Jyl saıyn ótetin bul jármeńkeni ál-Farabı atyndaǵy QazUÝ túlekteri men jumys berýshilerdiń kezdesý alańy dep aıtsaq bolady. Birneshe jyl qatarynan ótkizilip jatqan jármeńkeniń jumys berýshi seriktesteriniń sany jyl saıyn artýda. Bıylǵy jyly sharaǵa 170 uıym qatysyp otyr. Negizgi maqsat – QazUÝ túlekterin jumyspen qamtý.

 Bıyl bizdiń QazUÝ-dy 3600-deı bakalavr men 1000-nan astam magıstrant bitiredi. Jármeńkege jyl saıyn qatysatyn jumys berýshiler oqý jylynyń basynan bastap jármeńkege qyzyǵýshylyq tanytyp jatady. Óz josparymyzǵa sáıkes, barlyq kompanıalardy jármeńkege eki-úsh aı buryn shaqyramyz.

Jumys berýshilermen birlesken jumysty álbette sońyna deıin jetkizýge tyrysamyz. Olardyń jumyspen qamtylýy jaıly aqparatty biz 6-12 aı merzimnen keıin jınaqtaımyz. Seriktes kompanıalarǵa jiberilgen arnaıy saýalnamalar túlekterdiń kásibı deńgeıin anyqtaýǵa kómektesedi.

Bizdiń eń basty maqsatymyz – QazUÝ túlekterin jumyspen qamtý. Alaıda, shara Almaty qalalyq jumyspen qamtý ortalyǵynynyń qoldaýymen ótkizilip jatqandyqtan, onyń aıasyn keńeıtýge tyrysyp jatyrmyz. BAQ pen áleýmettik jelilerge, sondaı-aq, jumys oryndaryn jarnamalaıtyn arnaıy gazetterge jarnama berdik.  Sondyqtan, jumys tabýǵa nıetti kez-kelgen Almaty qalasynyń túlekterine, azamattaryna esigimiz ashyq.

Darhan Ahmed-Zakı, Ál-Farabı atyndaǵy QazUÝ-dyń oqý isi jónindegi prorektory:

- Bul jármeńke jeti jyl qatarynan ótkizilip jatyr. Biraq sońǵy úsh jylda baǵytymyzdy sál ózgerttik. Naryqtyq zamanda ár stýdent, ár túlek óziniń qoǵamdaǵy ornyn tabýy úshin  baryn salýy kerek.

Ózderińizge belgili, bir ret júzdesý arqyly jumysqa ornalasý múmkin emes. Al jármeńkege qatysý arqyly, ózine unaǵan kompanıamen aldyn-ala baılanys ornatyp, tájirıbe barysynda óziniń biliktiligin dáleldep bere alady. Bul bitirýshi stýdentterge jasalǵan keremet múmkindik.

Ekinshiden, jármeńkege qatysýshy jumys berýshiler bizdiń oqý baǵdarlamamyzǵa saı arnaıy usynystaryn, aldyn-ala túrli trenıń, kýrstaryn ótkizip jatady. Bul  qazirgi tańda jaqsy nátıje beretin kórsetkishterdiń biri. Iaǵnı, bizdiń oqý baǵdarlamamyzdyń sapasyn arttyrýǵa birden-bir kómekshi ekeni sózsiz. QazUÝ qazirgi tańda quzirettilikke baǵyttalǵan kásibı oqý baǵdarlamalaryn júzegi asyrýda.

Al, jármeńkeniń túpki maqsaty – stýdentterge óz biliktiligin, utqyrlyǵyn jumys berýshige dáleldep, kásibı deńgeıin shyńdaýǵa kómektesý.

 Gúlmıra Asırova, «Kazaqtelekom» AQ qyzmetkeri:

 - Maqsatymyz QazUÝ túlekterimen tanysý. Bizdiń kompanıa men QazUÝ arasynda ózara yntymaqtastyq týraly memorandým bar. Sol kelisim aıasynda túrli is-sharalar uıymdastyrylyp jatyr. Atap aıtsaq, jaqynda «Qazaqtelekommen birge» atty aýqymdy konkýrs uıymdastyryp, jaqsy nátıje kórsetken QazUÝ  stýdentterin iriktep, olardy baǵaly syılyqtarmen marapattadyq. Sondaı-aq, olar «Qazaqtelekomda» 2 aı óndiristik tájirıbeden ótý múmkindigine ıe boldy. Stýdentterdi tájirıbege shaqyrý, jaqsy kórsetkishtermen tanylǵandaryn  jumyspen qamtamasyz etý arqyly ózara baılanysty nyǵaıtyp kelemiz.

Ál-Farabı atyndaǵy QazUÝ búginde álemdik ýnıversıtettik reıtıńterde joǵaryǵa nyq qadamdar jasap keledi. Álemge áıgili halyqaralyq QS agenttiginiń (Ulybrıatanıa) 2015 jyldyń 15 qyrkúıeginde jarıalanǵan zertteýleriniń qorytyndylaryna súıensek, QazUÝ álemniń myqty 800 ýnıversıtetteriniń ishinde 275-shi orynǵa jaıǵasyp, top-300 ýnıversıtetteriniń qataryna engen. Osyndaı keleli nátıjelerge jetýde atalmysh is-sharalardyń óz úlesin qosqandyǵy aıtpasa da belgili.