«Oralman» dese boldy aqyly taıazdardyń kóz aldyna «bespredelshık», «bessovestnyı», «bezgramotnyı» bir beıshara elesteıdi de turady. Tipti qandastarymyzdyń ústinen kúlgendi bylaı qoıǵanda, bizdiń aramyzdaǵy keıbirimiz ońtústik óńirdiń qazaqtaryn jaqtyrmaımyz. Sondaǵymyz tiline kúlemiz, dástúrin mineımiz. Qyp-qyzyl almasy men qyzanaǵynyń, qyryqqabaty men qıarynyń qyzyǵyna batyp otyryp dattaımyz olardy. Betimiz búlk etpeı salat jasap jegende jaqsymyz. Alaıda tentektik qaı jerde de bar.

Qandastarymyzdyń arasynda bilimdileri joq dep kim aıtypty. Eliniń erteńin oılaýmen aǵartýshylyq jolynda eńbek etken ustaz, ǵalym Halıfa Altaıdyń Quran Kárim kitabyna jasaǵan aýdarmasyn áli kúnge deıin paıdalanyp júrmiz. Qudaı taǵala ol kisige razy bolsyn. Minekı, bul bir ǵana mysal. Tapsyryspen kúneltetin jýrnalıs-symaqtar da osy baýyrlarymyzǵa ábden tıisip boldy. «Erteń soǵys bola qalsa oralmandar bizben birge jaýǵa qarsy shyǵar ma eken, qalaı oılaısyzdar?» degen sekildi buzyq taqyryptarda maǵynasyz maqala jazyp júrgender de az emes. Ádette amerıkandyq saıahatshy nemese nemistiń qydyrympazdaryna qoradaǵy qoıymyzdy soıyp, dastarhanǵa baýyrsaq shashyp tastap, qymyz ben shubat usynatyn bizder qandas baýyrlar elim, jerim dep kelgende esikti ishten qulyptap alyp, úıde tyǵylyp jatatynymyz ótirik pe? Musylmannyń musylmanǵa degen syılastyǵy, janashyrlyǵy týraly sóz aıtý… Baıqaımyn, áýel basta mańdaıyna jazylǵan jetistigi úshin qazaq qazaqty jek kóredi. Teledıdardaǵy túrikterdiń ertegi ómirine aldanyp, tamsanyp, koreılerdiń buzylǵan qyzdary men boıanýǵa qumar erkekteriniń mádenıetine silekeıleri shubyryp otyrǵanda júrek búlinedi. Júrektegi mahabbattyń háli múshkil, ol bótendi jaqsy kórip tur.