Qudaıdan túsken eshbir din joq – buzyq,

Adamdyq, adaldyqtyń joly ol – ozyq.

Men ǵana naq musulman bolamyn dep,

Ketip júr keı «dinshilder» dinnen shyǵyp.

Qyrma murt, qatqyl qabaq, sholaq balaq,

Túsi sýyq, qaraıdy alaq-julaq.

Basqa kápir, adasqan – kil kúnákár,

Dańǵylynda jánnáttiń jalǵyz sol-aq.

Em qonbas ázázilge nansa nadan,

Ketedi eken ózgerip munshama adam.

Salt-dástúr, tarıhyńdy mánsuq etip,

Sektanyń sońynda júr qanshama adam.

Kim qondyrar qolyńa ushqan baqty,

Ata-ana sılaý, bilmeıdi jasqanbaqty.

Júregi musulmannyń qyldan názik,

Al bulardyń júregi – tastan qatty.

Qylǵany kúpirshilik, tákápparlyq,

Ne istetpes dúmshelik, aqyl tarlyq.

Esigin jánnáttiń teýip ashpaq,

Qolynda qudaıdan bardaı jarlyq.

Kishpeıil, ımandy jan – kóńili ashyq,

Ádeppenen sóıleıdi, ańdyp basyp.

Bul kúngi «dinshilderden» el shoshynar,

Kezikse syrt aınalyp, júrer qashyp.

Daq tústi haq ıslam – jolymyzǵa,

Dármen joq túzeıtuǵyn qolymyzda.

Qaradaı qara jaýyp qatyndar júr,

Sábıin tumshalaıdy sorymyzǵa.

İbilistiń úgiti – uran bop júr,

Qýys keýde, aýyzda qur quran bop júr.

Qanyna jazyqsyzdyń qumar bop júr,

Oılaǵany soǵyspen lań bop júr.

Sabyr joq, sana da joq, oılamy tar,

Jas jetkinshek adaspa, oılanyp al.

Qoı terisin jamylǵan qasqyrdaıyn,

Dinimizge qaýypty «dinshilder» bar.

Qımyldaıyq, qylmaıyq sary ýaıym,

Tilmenen din, jermen sý – bári ýaıym.

El bolýdyń úlgisi – Alashorda,

Iassaýı, Abaı, Shákárim joly – daıyn.

Nurbaqyt Baırahmetuly

23.07.2016