Qazaqstan Parlamenti joǵarǵy palatasynyń spıkeri Qasym-Jomart Toqaev keshe Týıtterdegi paraqshasynda Reseı quramasynyń Rıo Olımpıadasyna qatysý quqyǵyn ıelenýin durys sheshim dep baǵalady. Bul týraly Qamshy.kz habarlaıdy.  

Senat tóraǵasy «Halyqaralyq olımpıada komıteti   Reseıdi  Rıo Olımpıadasyna qatystyrý týraly durys sheshim shyǵardy. «Taza» sportshylar fýnksıonerler úshin jaýapkershilik almaý kerek», - dep jazdy.

Esterińizge salsaq, Lozanna qalasynda Rıo Olımpıadasyna Reseı qurama komandasynyń qatysý-qatyspaýyna qatysty talqylaý ótken bolatyn. Otyrys sheshimi boıynsha Halyqaralyq Olımpıada komıteti Reseı atletteriniń 2016 jylǵy Olımpıadaǵa qatysýy týraly sheshimdi sport túrleri boıynsha halyqaralyq federasıa qabyldaıtynyn aıtty.

Toqaev myrzanyń Reseıge búırek bura sóıleýi bir bul emes. Byltyr qarasha aıynda Túrkıa áskerıleri óz áýe keńistiginde Reseıdiń áskerı ushaǵyn atyp qulatqanda da, daýly máseleniń basy ashylýyn kútpesten Túrkıa tarapynyń áreketin «negizsiz» dep baǵalaǵan edi. Ol kezde de Senat basshysynyń pikiri qoǵamda biraz synǵa usharady.

Eń soraqysy jyl basyndaǵy Senattyń kezekti bir otyrysynda sol kezdegi Bilim jáne ǵylym mınıstri A. Sárinjipovten qazaqsha sóıleýin talap etken depýtat Sársenbaı Eńsegenovti tyıyp tastap, qazaq tilin ony meńgergisi kelmeı júrgenderge jyǵyp bergendeı qylyq tanytqan bolatyn.

Endi mine, tek saıasatta ǵana emes, sportta da kózge shyqqan súıeldeı bolǵan Reseıge taǵy ashyq jaqtasyp otyr. Osydan keıin halyqaralyq qatynastarda kópvektorly baǵyt ustanatyn elimizdiń saıası bedeline nuqsan keltirýi múmkin qısyq-qyńyr qylyqtarymen Q. Toqaev myrza Reseıge jaǵynǵysy kele me degen suraq ta týyndaıdy eken.