Aqpan aıynda «atyshýly» mereke qarsańynda, «ózgeniń qańsyǵyn tańsyq qyldy» dep  jastardy  jazǵyrýshi  edik. Al,  endi  ózgeniń emes,  ózimizdiń tól meıramymyz bar.  Ol kúni keshe ótken – Ǵashyqtar merekesi.  Halqymyzdyń  ańyzyna aınalǵan, jyr-dastandarǵa arqaý bolǵan  ǵashyqtardy ulyqtaıtyn mereke. Alǵashynda  Valentındi almastyrýǵa usynylsa da, jastar jaǵy ilip áketip,sońǵy jyldary shyn yqylaspen toılanatyn boldy.  Oǵan  qalalardaǵy  túrli  merekelik  sharalar, jastardyń áleýmettik  jeliler arqyly  bir-birine  joldaǵan ystyq lebizderi, shoq gúlder men kezdesýler, t.b. qyzyqty sharalar kýá.

     Máselen, Qyzylorda  qalasynyń  jastary alańǵa  jınalyp,  meıramnyń kórigin  qyzdyrypty. Qyzylorda oblysynyń Jastar odaǵy koǵamdyq birlestigi uıymdastyrǵan merekelik sharaǵa 10 myń adam jınaldy. Prozalyq kórinister, Respýblıkamyzǵa tanymal ánshiler, bı toptary, jaıdarmanshylar óner kórsetti. Qyz Jibek pen Tólegen, Qalqaman - Mamyr sekildi  qazaqtyń ǵashyqtarynyń kórinisteri qoıyldy. Alańda jastar flesh-mob uıymdastyryp, bı  bıledi.

      Jýrnalıs  Botagóz  Júsiptegi shara  týraly  bylaı deıdi:

  Qyzylordalyq jastar bul merekeni kádimgideı ortalyq alańda atap ótti.  Jastar da kóp jınaldy. Qatelespesem, bıyl 4 jyl jınalǵaly jatyr. Bul degenimiz aty óshkir Valentındi umyttyrýdyń ǵana amaly emes, qazaqylyqty dáripteýdiń bir kórinisi der edim.  Jeke óz basyma keler bolsam, meniń ár kúnim shynaıy sezimnen quralady. Júrek bar da, sezim bar. Meıram áser etpeıdi. Biraq appaq gúldi syıǵa alǵanymdy jasyryp kateıin»-, deıdi.

Al,  Jasulan Aldabergenov esimdi  azamat: «Merekeniń uıymdastyrylýy  unady. Jigitterdiń qyzdarǵa shynaıy sezimderin bildirgeni, sahnalyq kórinister   áser etti. Ánshiler, bı, flesh-mob ta  jaqsy ótti»,- dedi.