Aq saýytyn kıinip, ata babanyń aq týyn kóterip, qazaq dalasynyń aýmaqtyq tutastyǵy men shekara shebiniń bútindigin qas qaqpaı kúzetip, qasyq qany qalǵansha Jońǵar dushpandarymen aıqasyp, qasıetti atamekenniń synyq súıem topyraǵyn jaýǵa taptatpaı azat etken arýaqty batyr, qaharman handar, aqylman bıler búgingi áleýetti de sáýletti Qazaq eliniń tereń tamyryna nár beretin sarqylmas qýat desek bolady. Sondaı batyrlardyń biri – bıyl týǵanyna 300 jyl tolyp otyrǵan jaýjúrek sardar, qabyrǵaly bı, kóregen qolbasy Er Jánibek Berdáýletuly.

Elim dep eńiregen, jekpe-jekte týy jelbiregen  nar namysty marǵasqalar týraly tarıhshy  Qurbanǵalı Halıdı «Taýarıh hamsa» degen áıgili eńbeginde «Abylaı zamanynda batyr, sardar bolǵandar –  Qarakereı Qabanbaı, Altybaı batyr, Aqtanberdi batyr, Espenbet batyr, Mataı Shóńkeı batyr, Kereı Jánibek batyr, Býra Aqpantaı batyr, Qanjyǵaly Bógenbaı batyr, Básentıin Malaısary batyr» dep qas batyrlardyń esim soılaryn merýertteı tizip, marjandaı súzip, qasterlep-qadirlep ataıdy.

Han Abylaı, bas sardar Qabanbaılardyń dana basshylyǵynda júrgizilgen atajurtty azat etý soǵysyna bastan-aıaq qatysyp,  basqynshy jońǵarlardy túre qýyp, elin ejelgi ata baba qonysy Altaı, Tarbaǵataıǵa ornalastyrýǵa úles qosqan Er Jánibektiń esimi eline uran bolýy zańdy edi. Jaýgershilik zaman aıaqtalǵan soń kórshi eldermen mámilegerlik bitim jasasyp, saýda-ekonomıkalyq qatynasty nyǵaıtýǵa sharapaty tıgen Er Jánibekti halqy ot aýyzdy, oraq tildi bı sheshen retinde de qadirlegen. Aqyry elin ejelgi qonysqa ornyqtyrǵan batyrdyń  ǵazız rýhy qazirgi Shyǵys Qazaqstan oblysy, Jarma aýdany, Ortabulaq degen jerde máńgilik damyldapty.

Shyǵys Qazaqstan oblysynyń ákimshiligi men eljandy zıaly qaýym, isker azamattar bas qosyp, batyrdyń basyna 2009 jyly kúmbezdi eskertkish keshen ornatýy – búgingi urpaqtyń baba aldyndaǵy taǵzymy ári jastarǵa patrıottyq rýhtyń dánin egetin, otanymyzdyń shekarasyn qas qaqpaı qorǵap turǵan qazirgi erjúrek sarbazdarymyz ben sardarlarymyzdyń namysyn qaırap, jigerin shyńdaıtyn dańqty shara boldy.

Mine, bıyl batyr babanyń týǵanyna 300 jyl tolýyna oraı dástúr sabaqtastyǵyn jalǵastyryp, Elbasy aıtqan «Máńgilik el» rýhy baǵytynda halyqty jumyldyrý maqsatynda Shyǵys Qazaqstan oblysy ákimshiligi «El qorǵany – Er Jánibek» atty respýblıkalyq ashyq músháıra jarıalaıdy.

Músháıranyń maqsaty – eregesken jaýyn jer jastandyrǵan, eliniń shekarasyn keýdesimen qorǵaǵan batyr baba Er Jánibektiń jeńimpazdyq jolyn jyr jolymen órnekteý, sonymen qatar Er Jánibekpen birge el namysyn qorǵaǵan qolbastaǵan kósem, sóz bastaǵan sheshen Han Abylaı, Qarakereı Qabanbaı, Qanjyǵaly Bógenbeı, Shapyrashty Naýryzbaı, Tóle, Áıteke, Qazybek bı sekildi kóptegen tarıhı tulǵalardyń yntymaǵy men eldi biriktirý jolynda atqarǵan ólsheýsiz eńbegin  óleńmen dáriptep, jastarǵa úlgi etý; Er Jánibektiń sońynda qalǵan ańyz-ápsanalar, sheshendik sózder, QR mýzeıde saqtalǵan joryq saptyaıaǵy, QHR-daǵy qazaqtar arasynda saqtalǵan týy salynǵan sandyq, kezdik sekildi muralaryn óleń jyrǵa ózek ete otyryp, batyrdyń dańqty joly búgingi urpaqqa jalǵasqanyn madaq etý; Er Jánibektiń eliniń birligi men yntymaǵy, jeriniń aýmaqtyq tutastyǵy, halqynyń  yrys-berekesi jolynda ómirin sarp etken qabyrǵaly bı, kóregen qolbasshy retindegi tulǵasyn somdap, óleńmen órnekteý; Eń negizi – el basyna kún týǵan alqakól sulama, aqtaban shubyryndydan halqyn qutqaryp, urpaǵyn búgingi kúnge esen-aman jetkizýge negiz qalaǵan qaharman tulǵalardyń jıyntyq beınesin, zamana bederin Er Jánibek Berdáýletulynyń aınalasyna toptastyra somdaý arqyly erjúrek batyr, qabyrǵaly bılerimizdiń, daýylpaz jyraýlarymyzdyń danalyq, gýmanısik qundylyqtaryn urpaq zerdesine uıalatý; Osy arqyly túpkilikti nátıjede «Máńgilik el» ulttyq ıdeıasyna aqyndardyń jyrmen úles qosýyna jaǵdaı týǵyzý.

Batyr babanyń keskin-kelbetin jyr tilimen aıshyqty somdap, oqyrmannyń patrıottyq sezimine áser etip, júregin terbete alatyn kórkem týyndyǵa júlde beriledi. Músháıraǵa esh jerde jaryq kórmegen óleńder, tolǵaýlar, poemalar qabyldanady.

Bas júlde – jeńil avtokólik.

Birinshi oryn – bireý

Ekinshi oryn – ekeý

Úshinshi oryn – úsheý

Yntalandyrý syılyqtary – beseý

Músháıraǵa qatysýshylardyń shyǵarmalary kompúterge basylǵan bes danadan kem emes jáne elektrondy nusqasymen 2014 jyldyń 1 tamyzyna deıin myna mekenjaıǵa kelip túsýi kerek:

Indeks: 010000, Astana qalasy, Áýezov kóshesi, 20 «A», Sáken Seıfýllın murajaıy. Tel.: 32-84-67, 53-34-03, e-mail:astanakalamger@mail.ru.

Músháıra qorytyndysy 2014 jyldyń 15 tamyz kúni shyǵarylady. Júldegerlerdiń Óskemen qalasyna kelip-ketý jol shyǵyny men jatar orny máselesin uıymdastyrý komıteti moınyna almaıdy. Qazylar alqasynyń sheshimi qaıta qaralmaıdy.

Uıymdastyrý komıteti