Senat depýtaty Marat Qojaev premer-mınıstr Oljas Bektenovke jol qozǵalysy erejelerin óreskel buzýshylarǵa jazany qatańdatý bastamasymen júgindi.

Senat depýtaty Marat Qojaev premer-mınıstr Oljas Bektenovke jol qozǵalysy erejelerin buzǵany úshin jaza qoldaný tásilderin qaıta qaraý usynysymen júgindi. Bul bastamanyń sebebi – Almatyda JQE buzýshylardyń kóbeıýi jáne óreskel ereje buzýshylarǵa yqpal etetin tıimdi sharalardyń bolmaýy.

Birińǵaı ákimshilik quqyqbuzýshylyqtar reestriniń málimetinshe, tek 2024 jyly Almatyda jol qozǵalysy erejelerin buzýdyń 4,2 mıllıonnan astam jaǵdaıy tirkelgen. Onyń 3,7 mıllıonnan astamy avtomatty tirkeý quraldarynyń kómegimen anyqtalǵan. Alaıda, Qojaevtyń aıtýynsha, qoldanystaǵy jaza júıesi qaıtalanatyn buzýshylyqtardyń aldyn alýda tıimdi emes.

"Aıyppuldar kólik quralynyń ıesine taǵaıyndalady, alaıda júrgizýshiniń buǵan deıingi quqyqbuzýshylyqtary esepke alynbaıdy. Bul óreskel ereje buzýshylarǵa jyldar boıy jazadan qoryqpaı, jol qozǵalysy erejelerin elemeýge múmkindik beredi", – dedi depýtat.

Qojaev mysal retinde Almatyda bir júrgizýshiniń bir jyl ishinde 143 ret ereje buzyp, 3 mıllıon teńgeden astam aıyppul tólegenin keltirdi. Alaıda 50 paıyzdyq jeńildikpen bul júrgizýshiler aıyppuldaryn tólep, jol qozǵalysy erejelerin qasaqana buza beretinin aıtty.

Depýtattyń aıtýynsha, jol qozǵalysy erejelerin buzýdy avtomatty túrde tirkeıtin tehnıkalyq quraldar quqyqbuzýshylyqtardy anyqtaýda tıimdi bolǵanymen, júrgizýshiniń daıyndyǵy men joldaǵy qaýipti minez-qulqyn baǵalaı almaıdy. Bul jol-kólik oqıǵalarynyń kóbeıýine, keıde qaıǵyly jaǵdaılarǵa ákelip soǵady.

"Kórip otyrǵanymyzdaı, júıeli ereje buzýshylar úshin qazirgi aıyppuldar tıimdi shara emes. Sondyqtan jazalaý tásilderin qaıta qaraý qajet", – dedi Qojaev.

Óz ótinishinde depýtat halyqaralyq tájirıbeni qoldanýdy usyndy. Mysaly, Germanıada aıyppuldyq upaı júıesi bar, Fransıada qaıtalanatyn quqyqbuzýshylyqtar júrgizýshi kýáligin ýaqytsha toqtatýǵa ákelýi múmkin. Al Sıngapýrde óreskel ereje buzýshylardy jol qozǵalysy erejeleri boıynsha qaıta oqytýǵa mindetteıdi, tipti keı jaǵdaılarda avtokólikterin tárkileýi múmkin.

Osyǵan baılanysty Qojaev kelesi sharalardy usyndy:

• Jol qozǵalysy erejelerin 10 jáne odan kóp ret buzǵan júrgizýshilerge teorıalyq emtıhandy qaıta tapsyrýdy mindetteý;
• Qaıtalanatyn quqyqbuzýshylyqtar úshin jazany qatańdatý, júrgizýshi kýáligin ýaqytsha toqtatý múmkindigin qarastyrý;
• Júrgizýshiniń zańbuzýshylyq sanyna baılanysty aıyppul júıesin dıfferensıalaý;
• Óreskel quqyqbuzýshylarǵa 50 paıyzdyq aıyppul jeńildigin alyp tastaý.