Búgin Ulttyq kitaphanada respýblıkalyq balalar men jasóspirimderge arnalǵan «Ulan» gazetiniń 95 jyldyǵyna oraı merekelik is-shara ótti. Qazaq baspasóziniń rýhanı áýleti, qara shańyraǵy bolǵan atalmysh gazet kúni búginge deıin talaı balanyń shyǵarmashylyǵyn shyńdap, jazarman tulǵa retinde beıimdep keledi. Bul – birneshe býynnyń balalyq shaǵynyń bólshegine aınalǵan, elimizdiń rýhanı tarıhynda tereń izi bar basylymnyń taǵylymdy merekesi boldy.
Bıyl 95 jyldyq mejeni eńsergen «Ulan» – birneshe býynnyń júreginen oryn alǵan, jas urpaqqa baǵyt-baǵdar kórsetip kele jatqan rýhanı áýlet. Saltanatty is-sharada basylymnyń jas órenderdiń sana-sezimine ulttyq qundylyqty sińirýdegi, olardyń oı-órisin damytý men shyǵarmashylyqqa baýlýdaǵy róli erekshe ataldy. Gazet ujymynyń balalar tárbıesine qosqan úlesi men júıeli jumysy el erteńine salynǵan berik irgetas retinde baǵalanyp, redaksıa ujymyna aqjarma tilekter arnaldy.
Qatysýshylar nazaryna «Ulan gazetiniń tarıhynan syr shertetin – ulaǵatty urpaq» atty fotokórme usynyldy. Onda gazettiń ár kezeńin beıneleıtin 500-den astam muraǵat sýret, burynǵy redaktorlar men avtorlardyń esteligi qoıyldy. Buǵan qosa, oqýshylar men qonaqtar arnaıy daıyndalǵan fotojáshikte estelik sýretke túsip, gazetpen baılanysty óz estelikterin eske aldy. Bul – tek kórme emes, bir dáýirdiń rýhanı aınasy ispetti mazmundy alań boldy.
Sondaı-aq Almatydaǵy fızıka- matematıka baǵytyndaǵy Nazarbaev zıatkerlik mektebiniń oqýshylary usynǵan robototehnıka kórmesi erekshe áser qaldyrdy. Cristabol komandasy AQSH-tyń Húston qalasynda ótken, 110 elden 50 myńnan asa oqýshy qatysqan halyqaralyq First Championship 2025 ınjenerlik týrnırinde júldeli 3-oryn alǵan bolatyn. Olardyń jobalary kórmege kelgen balalar men ata-analar tarapynan úlken qyzyǵýshylyq týdyrdy.
Merekelik konserttik baǵdarlama da keń aýqymda uıymdastyryldy. Ahmet Jubanov atyndaǵy mýzyka mektebiniń ansambli, «Iapýraı» halyq ánin oryndaǵan oqýshylar, Abaı atyndaǵy mekteptiń aıtyskerler toby, TEDx formatynda sóz sóılegen jas spıkerler kópshilikti tánti etti. Sondaı-aq «Qustar áni» jáne «Halyq merekesi» shyǵarmalary shyrqalyp, oqýshylar men qonaqtar shyǵarmashylyq shabyt aldy.
Mereıtoı aıasynda oqýshylar arasynda uıymdastyrylǵan shyǵarmashylyq baıqaý da qorytyndylandy. «Ulan» gazeti men Zeınolla Sánik qorynyń qoldaýymen bıyl ekinshi ret ótkizilgen «Tastúlek» shyǵarmashylyq baıqaýynyń jeńimpazdary marapattalyp, olarǵa arnaıy aqshalaı syılyqtar tabystaldy. Bul – balanyń qabiletin baǵalaýǵa, talpynysyn qanattandyrýǵa baǵyttalǵan tamasha bastama retinde tanyldy.
«Ulan» gazetiniń 95 jyldyǵy – jaı ǵana bir basylymnyń mereıtoıy emes, bul tutas qazaq rýhanıatynyń balalyq shaǵymen qaıta qaýyshqan sáti. «Ulan» – ult bolashaǵynyń úni, oıly órenniń serigi, armanshyl júrektiń senimdi syrlasy. Búgingi urpaqqa, erteńgi kóshbasshylarǵa shabyt syılaıtyn rýhanı mektep retindegi róli aıryqsha. Zıaly qaýym ókilderi, ustazdar, mektep oqýshylary, «Ulannyń» jas tilshileri men belsendi avtorlar qatysqan bul kesh esten ketpes rýhanı kúnge aınaldy. Búgingi mereıtoı bolashaqta olardyń shyǵarmashylyq jolyna baǵyt-baǵdar beredi degen senim mol.
