Úıdiń sandyǵynda jatqan asyl mura mýzeıge oralyp jatyr. Oralda jurt kóne Qurandar men qoljazbalardy jappaı ótkizip, oblystyq mýzeı qoryn 200-ge jýyq jádigermen tolyqtyrdy.
200-ge jýyq artefakt mýzeıge tústi
2025 jyly bastalǵan qoǵamdyq bastamaǵa óńir turǵyndary ún qosty. Mýzeı qyzmetkerleri ákelingen dúnıelerdi qabyldap, tizimge alý men ǵylymı sıpattama jazý jumysyn júrgizip jatyr.
Jınalǵan eksponattardyń qataryn kóne Quran basylymdary, ǵasyrlyq tarıhy bar kitaptar jáne ártúrli jazba eskertkishter qurady.
Qorǵa qalaı ótkiziledi
Ieleriniń qalaýymen qujattar men kitaptar mýzeıdiń turaqty ne ýaqytsha qoryna qabyldanady. Osylaısha, otbasylyq shejire men el tarıhyna qatysty sırek dúnıeler kásibı jaǵdaıda saqtalady.
Katalogtar qazaq tilinde, QR-kodpen shyǵady
Oblystyq tarıhı-ólketaný mýzeıiniń dırektory Jantas Safýllın katalogtar týraly málimet berdi: «Katalogtardy QR-kodpen shyǵaramyz. Negizgi nusqany qazaq tilinde ázirleımiz, al ilespe aýdarmalardy QR-kod arqyly usynamyz. Ǵalymdar katalogtarmen tanysyp, keıin qordaǵy túpnusqamen jumysyn jalǵastyra alady», – dedi ol.
Málimet paraqshalary qazaq, orys, aǵylshyn jáne túrik tilderinde daıyndalyp, jınaq kúıinde basylyp shyqpaq.
Ulttyq murany birge saqtaıyq
Zertteýshilerdiń aıtýynsha, halyq qolynda áli de anyqtalmaǵan qundy jazbalar men kitaptar kóp. Mýzeı mamandary ıelerimen baılanysyp, jádigerlerdiń shyǵý tórkinin anyqtap, ǵylymı aınalymǵa qosý jumysyn jalǵastyryp jatyr.
Tarıhqa nemquraıdy qaramaǵan jurttyń arqasynda óńirlik qor tolyqsyp, ulttyq jadynyń jazba aıǵaqtary saqtalyp jatyr.
Bul týraly aımaqtaǵy telearna sújetinde habarlandy.
Bul týraly Qamshy.kz aqparat agenttigi habarlaıdy.
