Eýroodaq Reseıge qarsy tórt sanksıalyq rejımdi bir mezgilde engizdi.
20 mamyrda Brússelde ótken Eýroodaq elderiniń syrtqy ister mınıstrleri keńesinde Reseıge qarsy bir ýaqytta tórt túrli sanksıalyq rejımdi qamtıtyn eń aýqymdy sharalar paketi maquldandy. Sanksıalar:
-
Ýkraınaǵa qarsy soǵys júrgizgeni úshin;
-
Adam quqyqtaryn óreskel buzǵany úshin;
-
Batys elderine qarsy gıbrıdtik shabýyldar jasaǵany úshin;
-
Hımıalyq qarý qoldanǵany úshin engizildi.
Barlyǵy 130-dan astam jeke sanksıa qabyldandy. Olar Reseıdiń áskerı-ónerkásip kesheni, "kóleńkeli flot", jalǵan aqparat taratýshylar men úshinshi elder arqyly sanksıany aınalyp ótýshilerge baǵyttalǵan.
Ýkraınadaǵy soǵysqa baılanysty 17-shi sanksıalar paketi aıasynda 75 jańa tulǵa jáne 189 keme tizimge qosyldy. Gıbrıdtik shabýyldar úshin 27, adam quqyqtaryn buzǵany úshin 28 tulǵaǵa sanksıa salyndy. Hımıalyq qarý boıynsha tizimge Reseıdiń qorǵanys qurylymdary men zertteý ınstıtýttary endi.
Eýrokomıssıa basshysy Ýrsýla fon der Leıen jańa sanksıalar paketi daıyndalyp jatqanyn aıtty. Ol "Soltústik aǵyn" jobalary men reseılik munaı baǵasyna qatysty shekteýlerdi qamtýy múmkin.
