Astanada Qazaqstanda alǵashqy atom elektr stansıasyn (AES) salýǵa arnalǵan oryn tańdaý boıynsha bes kúndik halyqaralyq semınar bastaldy. Sharaǵa Halyqaralyq atom energıasy agenttigi (MAGATE) ókilderimen qatar, Energetıka mınıstrligi, Ekologıa jáne tabıǵı resýrstar mınıstrligi, Atom energetıkasy jónindegi agenttik jáne «Qazaqstan atom elektr stansıalary» JSHS mamandary qatysýda.

Semınar barysynda AES qurylysyna qolaıly oryndardy anyqtaýda qoldanylatyn MAGATE usynǵan halyqaralyq standarttar men ádisnamalar jan-jaqty talqylanbaq.

«Qazaqstan atom elektr stansıalary» JSHS bas dırektorynyń orynbasary Rınat Oqasovtyń aıtýynsha, qazirgi tańda Almaty oblysy Jambyl aýdanyna qarasty Úlken kentiniń aýmaǵy negizgi nusqa retinde qarastyrylyp otyr. Semınar aıasynda osy óńirdiń naqty qaı tusy AES qurylysyna eń qolaıly ekenin ǵylymı negizde taldaý josparlanǵan.

— Biz MAGATE mamandaryn Qazaqstanǵa shaqyryp, jergilikti antropogendik, tehnogendik jáne tabıǵı faktorlardy eskere otyryp, oryn tańdaýǵa qatysty tájirıbesimen bólisýdi suradyq. Bul bilim AES qurylysyna laıyqty oryndy naqty anyqtaýǵa kómektesedi, — dedi Rınat Oqasov.

Onyń sózinshe, Úlken kent pen Kýrchatov qalasy birneshe jyl boıy zerttelip keledi. Qazir bul zertteýler tereńdetilip, ınjenerlik-tehnıkalyq saraptamalar, seısmıkalyq belsendilik, klımattyq jaǵdaı, topyraq pen sý quramynyń erekshelikteri jáne áleýmettik-ekonomıkalyq aspektiler egjeı-tegjeıli taldanýda.

Semınardyń ashylýynda sóz sóılegen Atom energetıkasy jónindegi agenttik tóraǵasynyń orynbasary Áset Mahambetov pen MAGATE sarapshylar tobynyń jetekshisi Lı Hen Ý ıadrolyq qaýipsizdik pen ashyqtyqtyń mańyzdylyǵyna nazar aýdardy.

— Qazaqstan ıadrolyq qaýipsizdik, qorǵanys jáne ashyqtyq máselelerin basty nazarda ustaıdy. Biz MAGATE standarttary men úzdik halyqaralyq tájirıbelerdi tolyq saqtaýǵa nıettimiz, — dedi Áset Mahambetov.

Bul semınar AES qurylysyna qatysty qabyldanatyn sheshimderdiń ǵylymı jáne halyqaralyq talaptarǵa saı bolýyn qamtamasyz etýge baǵyttalǵan mańyzdy qadam bolyp sanalady.