Qazaqstanda Joshy han men Altyn Ordanyń qurylýyna arnalǵan «Altyn ımperıa» tarıhı serıalynyń túsirilim kezeńi resmı túrde aıaqtaldy. Joba 2025 jyldyń 14 aqpanynda bastalyp, 11,5 aptaǵa sozyldy. Barlyq túsirilim Qazaqstan aýmaǵynda ótti: «Qazaqfılm» stýdıasynan bastap Kóshpendiler qalasy men Tamǵaly Tas petroglıfterine deıin.

Serıaldy Netflix-te tanymal bolǵan Karga Seven Pictures stýdıasy túsirip jatyr. Rejıseri – Emre Sahın, senarı avtorlary qatarynda «Vıkıngter» jobasyna qatysqan tarıhshy Djastın Pollard bar.

Týyndy tarıhı dáldikke erekshe mán berip, Altyn Orda tarıhyn zerttegen halyqaralyq sarapshylardyń qatysýymen jasaldy. Túsirilimge 700-ge jýyq adam qatysty, olardyń 70%-y qazaqstandyq mamandar.

Serıaldyń kórinisterinde otandyq Nomad Stunts toby daıyndaǵan iri shaıqastar men jekpe-jek horeografıalary erekshe oryn alady. Akterlik quramǵa 350 adam iriktelip alynǵan, onyń ishinde qazaqstandyq ártisterdiń oıyny joǵary baǵalandy.

Joba qazir post-prodakshn kezeńine ótti – montaj, dybys pen vızýaldy effektiler jasaý jumystary júrgizilýde. Serıal halyqaralyq aýdıtorıaǵa usynylatyn Qazaqstan tarıhyndaǵy eń aýqymdy tarıhı jobalardyń biri bolmaq.