1 mamyr — Qazaqstan halqynyń birligi kúni. Bul — Qazaq bıligi basa dáripteıtin mártebeli merekeniń biri. Al onyń máni men maǵynasy, tarıhy men salmaǵy tym aýyr jáne taǵdyrly.

  Bul birlik — Syrym men Isataıdyń, Kenesary men Naýryzbaıdyń basyn jutqan, san mıllıon qazaqty ashtan qyrǵan, bordaı tozdyrǵan, Alash arystaryn túp-tuqıanymen tuzdaı qurtqan zulmat zamannyń tyrtyǵy túsken tragedıaly birlik. Bassyz, baǵdarsyz qalǵan bizdiń el qarý kótergendi de, qazan kótergendi de, balta kótergendi de, balǵa kótergendi de erikti, eriksiz baýyryna basqan birlik. Jebirleri jer anamyzdyń tósinen qan aǵyzdy. Ash aryqtary bir jutym súttiń jartysyn ishti. Bilimdisi bilimin bólisse, irińdisi Alashtyń aǵzasyna jara saldy. Qyrǵyz dedi, qaısaq dedi, buratana dedi… Qas nıetter úshin qazaqtan qor halyq bolǵan joq. Saılanyp kelgeni de, aıdalyp kelgeni de birte-birte ózin qojaıyn sezindi. Baba qonysqa Batystan kelgen slaván tektiler, sottalǵandar men soǵys tutqyndary, Shyǵystan kelgen tildes, dindes turǵylyqtylar tamyr jaıdy. Qyzdy-qyzdymen bul kúnde «130 ulttyń uıyǵyna aınaldyq» dep maqtanýǵa jettik.

   Iá, kópulttylyq kemshiligimiz emes, artyqshylyǵymyz bolýǵa tıis. Shynynda da, urandatarlyq «Uly» sóz. Sondaıda “129” ultty baýyryna basyp, tórine otyrǵyzǵan Qazaq degen qandaı Uly halyq dep tańǵalasyń. Ókinishtisi, jerin, tórin, nanyn, baryn bergen «Normalnyı», «Velıkıı» qazaqtyń tilin «Ne normalnyı», ózin «Mambet» sanaıtyndar da joq emes. Tipti Prezıdenttiń sońǵy sózinen soń óz elinde, óz jerinde, baba qonysynda Memlekettik tildi talap etken qazaq «májbúrleýshi», «arandatýshy» atalyp otyr. Solaı bolmasyn dep dabyl qaqqanymyz dalaǵa ketkendeı boldy. «Estıtin memleket», «Ádiletti Qazaqstan» áli de jalań uran, arzan pıardan aspaı otyr. Alashty alańdatqan «Til jarasy», «Din talasy», «Dil alasy» aıǵaılap aıtýǵa bolmaıtyn, sybyrlap qana kúńkildeıtin taqyrypqa aınaldy. Asyly, «shyn birlik» bar jerde mundaı syzdaýyqtardyń syry zerttelip, emi ashyq talqylanýǵa tıis. Eldiń tynyshtyǵy tek Qazaqqa ǵana kerek bolsa, “birlik” degen sózdi umytqanymyz jón…

   Al shynaıy birlik tıtýldy ultty bar bolmysymen qabyldap, qundylyǵyna qurmetpen qaraǵandarda ǵana bolady. İshtegi otandastarymyz úshin ǵana emes, syrttaǵy Qudaıy kórshilerimizge de osy prınsıp ólshem bolýy qajet.

Qazaqstan halqy birliginiń altyn dińgegi qazaqtyń «toleranttylyǵy» emes, tili bolýy shart. Óıtkeni «Tózimdiliktiń» shegi bar. Al Til qudiretiniń shegi joq!

Ókinishtisi, eldegi ulttyq ıdeologıa tym aqsap tur. Saıası tehnologtar da “kónerdi”, qazaqtyń kúndelikti ómir shyndyǵynan beıhabar. Mysaly, “Májbúrlemeý” sózin qazaq tildilerge sypaıy jetkizip, Memlekettik tildiń taban tirer tıanaq, tarazy basar Zań ekenin orystildilerge qadap aıtsa, eshkim renjimes pe edi?

Qalaı desek te, Mereke qutty bolsyn! Birliksiz tirlik bolmaıtynyn, tıtýldy ulttyń tynyshy ketse, Eldiń yrysy ketetinin eshkim umytpasyn!